Ministru Turizmu, Komérsiu, no Industria, José Lucas do Carmo no Diretora Nasionál Mercy Corps, Jules Keanea, asina nota entendimentu, iha salaun MTKI, kinta (16/12). Imajen TATOLI/Arminda Fonseca

DILI, 16 dezembru 2021 (TATOLI)–Ministériu Turizmu, Komérsiu, no Indústria (MTKI) no Mercy Corps, kinta ne’e, asina nota entendimentu kona-ba promove produtu resiklajen no suporta  negósiu sira.

Iha biban ne, Ministru Turizmu, Komérsiu, no Industria, José Lucas do Carmo, hateten, objetivu asina nota entendimentu ne’e hodi parte rua bele serbisu hamutuk fó solusaun ba lixu, liuhosi indústria kiik hanesan resiklajen lixu sai sasán ne’ebé bele uza.

“Uluk beilala sira-nia tempu, beleza Timor-Leste virjen hela tanba laiha lixu, maibé hafoin ita ukun-an, bainhira hakarak halo dezenvolvimentu ba ita-nia rai maka lixu barak tebes to’o hamosu inundasaun, entaun liuhosi kooperasaun ita bele serbisu hamutuk rekolla lixu hodi utiliza fali plástiku sira ne’e sai matéria util no produtu resiklajen bele halo redusaun lixu plástiku iha Timór laran tomak, liuliu iha Dili laran,” Ministériu José Lucas, hateten, iha salaun MTKI, Farol.

Notísia relevante: Heineken-Caltech sei Halo Lansamentu ba Prosesu Resiklajen Lixu

Kooperasaun entre parte ministériu ho Mercy Corps hanesan programa ne’ebé aliña ho programa Governu hanaran ‘zero plástiku’.

Hosi nota entendimentu ne’e, sei iha apoiu tékniku, asisténsia, no transformasaun abilidade entre parte rua.

Iha fatin hanesan, Diretora Nasionál Mercy Corps, Jules Keanea, konsidera, entendimentu ne’e ho objetivu hodi tau hamutuk forsa dezenvolve ekonomia sirkulár liuhosi resiklajen.

Ministru Turizmu, Komérsiu, no Industria, José Lucas do Carmo no Diretora Nasionál Mercy Corps, Jules Keanea, asina nota entendimentu, iha salaun MTKI, kinta (16/12). Imajen TATOLI/Arminda Fonseca

“Tanba ita-nia kooperasaun atu apoia negósiu lokál sira no promove vizaun Timor-Leste atu sai nu’udar destinu turístiku ne’ebé kompetitivu, proteje beleza naturál no patrimóniu kulturál, ne’ebé prevee ona iha polítika nasionál turizmu Timor-Leste,” nia hateten.

Nune’e liuhosi kolaborasaun ne’e, faze dahuluk sei dedika hodi hatán ba problema lixu plástiku sira ne’ebé fó ameasa ba nasaun nia ambiente no ba oportunidade ekonómiku sira.

Parseria ne’e sei reforsa rekursu sira hosi intervensaun tolu ne’ebé Mercy Corps halo hela, hodi foka liu ba kriasaun ekonomia sirkulár ne’ebé inkluzivu ba plástiku hanesan programa Plastic Upcycling Alliance ne’ebé finansia hosi Ajensia Estadu Unidu ba dezenvovimentu internasionál, ne’ebé programa preparadu finansia hosi Ajénsia Koperasaun Internasionál Koreia (KOICA) inklui programa hamenus lixu plastiku, ne’ebé finansia hosi Uniaun Europeia (UE).

“Serbisu ho parseiru xave sira hosi setór privadu no sosiedade sivil, hanesan intervensaun  ne’ebé haree liu ba koligasaun ne’ebé envolve negósiu no enkoraja asaun koletiva,” nia hateten.

Tanba ne’e, durante kooperasaun, Mercy Corps sei serbisu hamutuk ho United States Agency for International Development (USAID), KOICA, UE, empreza konstrusaun lokál Caltech, no empreza brewer global Heineken, ne’ebé hanesan membru Aliansa Solusaun Plastic no parseria inovadora ne’ebé finansia hosi multi-doadór, ne’ebé ho objetivu atu lori Timor-Leste ba estatus neutrál ba utilizasaun plástiku la nesesáriu limita no troka, lixu plástiku sira kolleta no resikla ba produtu lokál no ambiente nasaun nian sei prezerva.

Nune’e, programa resiklajen ne’ebé durante ne’e sira halo no iha ona rezultadu mak hanesan, tizolu uza matéria produtu bee hemu mamuk, masa mamuk mina, plástiku no seluk tan, kahur ho rai henek sai tizolu, uza plástiku sira sai brinkus no korrente tara kakorok.

Jornalista : Arminda Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here