Sekretáriu Estadu Ambiante, Demétrio do Amaral de Carvalho. Imajen TATOLI/Egas Cristovão

DILI, 10 janeiru 2020 (TATOLI) – Sekretáriu Estadu Ambiente (SEA), Demétrio do Amaral de Carvalho, hatete empreza Heineken no Caltech sei halo lansamentu ba prosesu resiklajen lixu ba matéria konstrusaun.

“Iha tempu badak, ita sei bá asiste empreza rua ne’e halo prosesu resiklajen lixu ba matéria konstrusaun”, Demétrio ba jornalista sira bainhira halo inspesaun ba konstrusaun edifísiu Dili Financial Business Center (DFBC) iha Colmera-Dili, ohin.

Inisiativa husi kompañia rua ne’e hakarak halo resiklajen lixu sai matéria konstrusaun bainhira SEA aprezenta polítika zero plastiku.

Eis deputadu ne’e friza empreza Heineken no Caltech inklui ajénsia internasionál JICA apoia fundu ba Mercy Corps hodi resikla lixu ba materiál konstrusaun.

Empreza Caltech ne’ebé ho esforsu rasik halo tratamentu ba lixu ka resiklajen ba kaixa mamuk, botir, ákua no mós sunu sasán ospitalár ka medical waste atubele mellora ambiente iha país ne’e.

Polítika zero plástiku ne’e define hanesan enfrenta prioridade tanba Timor-Leste nia kuantidade lixu plástiku ne’ebé prodús porsentu 18 to’o 20.

Bazeia ba lei baze ambientál númeru 26/2012, lei numeru 2/2017, kona-ba sistema jestaun rezíduu sólidu urbanu no dekretu lei 32/2016 sobre estratéjia melloramentu jestaun lixu urbana sira hasai mós sirkulár ida ba empreza sira atu fó avizu ba kompradór atu hahú utiliza ona pasta amigavel ho ambiente bainhira halo kompra.

Antes ne’e, Ministru Estadu Presidensiá Konsellu Ministru, Hermenegildo Augusto Cabral Pereira, dehan Governu liuhosi Konsellu-Ministru, aprova rezolusaun Governu ba polítika zero plástiku hodi halo redusaun ba utilizasaun kímiku.

“Governu liuhosi Funsaun Públika atu hahú fó ezemplu di’ak, atu to’o tempu bele jeneraliza área seluk liuhosi Sekretáriu Estadu Ambiente”, katak.

Polítika zero plastiku ne’e, ministru dehan tanba konsidera poluisaun ne’ebé mosu, provoka hosi utilizasaun produtu kímiku nu’udar dezafiu prinsipál ba umanidade no ambiente. Polítika ne’e mós oinsá atu bandu no regulariza servisu hodi uza plástiku kímiku iha fatin servisu.

Jornalista : Florencio Miranda Ximenes
Editora : Maria Auxiliadora

HAKEREK NO HATÁN

Please enter your comment!
Please enter your name here