Prezidente Konsellu Administrasaun IGE, I.P, Ermenegilda da Costa Laurentina. Imajen TATOLI/António Gonçalves

DILI, 16 dezembru 2021 (TATOLI)–Prezidente Konsellu Administrasaun Institutu Jestaun Ekipamentu, Institutu Públiku (IGE, I.P, sigla portugés), Ermenegilda da Costa Laurentina, heteten, institutu konsege poupa orsamentu Estadu millaun $7 hosi infraestrutura, iha tinan ne’e nia laran.

“Karik ita fó ba empreza privada sira, ita tenke hasai  millaun $7 atubele loke konkursu sira mak bele serbisu, maibé ita-nia Primeiru-Ministru lakohi tanba tenke aproveita ita-nia rekursu ne’ebé iha, bainhira labele mak foin loke konkursu entaun durante ne’e IGE, I.P halo ona nia serbisu tun diretamente hodi rezolve infraestrutura públika,” Prezidente IGE, I.P heteten ba Agência TATOLI, foin lalais ne’e, iha edifísiu Farol.

Orsamentu tinan 2021 ba institutu ne’e hamutuk millaun $5, ne’ebé hosi orsamentu ne’e millaun $2 sosa mákina no millaun $3 ba atividade operasionál iha terrenu.

“Ba tinan ne’e reseita ne’ebé ami hetan liuhosi fó aluga mákina pezadu ba empreza sira no fa’an brites hamutuk $137.000, ne’ebé reseita sira ba hotu kaixa Estadu,” nia akresenta.

Papél IGE, I.P mak loke estarda foun, normaliza mota no aterru estrada iha territóriu laran tomak.

“Iha VIII Governu nia tempu, totál  pedidu hosi autoridade lokál sira haruka mai IGE, I.P hamutuk 441, ita rezolve ona estrada 183, ho ninia naruk kilómetru 225, no normalizasaun mota kilómetru 38, maibé restu seidauk tanba kondisaun limitadu,” nia tenik.

Notísia relevante: IGE, I.P simu pedidu hamutuk 411 loke estrada iha área rurál

Hosi pedidu 441, institutu ne’e loke estrada rurál iha munisípiu 12 la inklui Rejiaun Adiministrativu Espesiál Oé-cusse Ambeno (RAEOA) tanba tinan hirak liuba IGE, I.P entrega ona ekipa inklui mákina pezadu ba autoridade rejiaun ne’e, ne’ebé daudaun Autoridade RAEOA rasik mak jere.

Tuir Prezidente Konsellu Administrasaun IGE, I.P, tinan ne’e, iha ona planu atu sosa tan mákina foun, ne’ebé ninia prosesu agora iha ona Primeiru-Ministru nia fatin no dokumentu finaliza ona, ne’ebé tempu badak sei fó sai iha Komisaun Nasionál Aprovizionamentu (CNA, sigla portugés), ne’ebé hein de’it prosesu kontinuasaun.

“Ita presiza hola tan mákina pezadu sira tanba durante ne’e dezafiu ne’ebé ami hasoru iha terrenu dala-ruma mákina kiik sira la to’o,” nia dehan.

Daudaun ne’e ekipa IGE,I.P destaka ona iha munisípiu sira hanesan  Baucau, Viqueque, Lautém, Ainaro, Covalima, Bobonaro, Aileu, Liquiçá, Dili, Manatuto, liuliu Natarbora ne’ebé presiza tebes ekipamentu.

Governu deside kria IGE iha tinan 2005 hanesan institutu públiku ho autonomia administrativa, finanseira no patrimóniu própriu ne’ebé responsável ba boa jestaun no esplorasaun ba bens iha ámbitu prosekusaun dezenvolvimentu infraestrutura no nesesidade ba serbisu administrasaun públika.

Daudaun, institu públiku ne’e iha faze transforma ba empreza públika, atubele halo atendimentu ba sidadaun ho efisiénsia no efikásia no iha tempu hanesan bele rekolla reseita ba kofree Estadu.

IGE, I.P iha ona esperiénsia kona-ba poupansa orsamentu no rekolla reseita, tanba konsege poupa osan Estadu millaun $4, ho intervensaun direta ba terrenu hodi rezolve infraestrutura públika ne’ebé hetan estragu tanba dezastre naturál.

Iha tinan 2020 institutu konsege rekolla reseita $160.000, maibé hosi tinan  2019 to’o 2020 rekolla reseita millaun $2, hosi kompañia privada ne’ebé aluga mákina pezadu hodi hala’o serbisu iha terrenu, ne’ebé empreza sira selu direta iha Banku.

Jornalista : Arminda Fonseca

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here