Bombeiru to’o fatin akontesimentu maibé la konsege salva uma-trasionál, sábadu (11/12). Imajen/Espesiál

DILI, 11 dezembru 2021 (TATOLI)—Ahi-han uma-tradisionál Leiaval iha aldeia Sentrál, suku Fuiloro, postu administrativu Lospalos, munisípiu Lautém, iha sábadu maizumenus tuku 10:00 liu.

“Derepente de’it ahi han tiha uma-adat ne’e, ema hakilar entaun ha’u halai sai ba haree no kontaktu kedas Bobeiru, sira mai rega duni maibé labele salva tanba ahi han lais loos,” Sasin, Julio Maria de Jesus Canto, informa ba Agência TATOLI, via telefónika, sabadu ne’e.

Kona-ba motivu akontesimentu ne’e seidauk hatene serteza tanba bainhira akontese laiha ema mak akompaña.

“Ohin ha’u kontaktu ona ba Administradór Lautém no informa ona akontesimentu ne’e ba nia, nune’e informa ba Polísia hodi halo investigasaun,” nia akresenta.

Notísia relevante: Lautém-oan akumula forsa re-konstrui uma tradisionál Le’e-Iaval

Ahi-han uma-tradisionál Leiaval iha munsípiu Lautém, sábadu (11/12). Imajen/Espesiál

Nune’e, hanesan Lautém-oan, nia husu ba Governu atu buka meiu hamutuk ho komunidade hodi halo konstrusaun foun, tanba uma-tradisionál ne’e sai patrimóniu Estadu.

“Antes ne’e Lautém-oan sira ne’ebé serbisu iha Inglatera, Koreia no rai seluk tan, iha ona inisiativa hakarak hadi’a,” nia dehan.

Iha sorin seluk, Administradór Lautém, Domingos Sávio, hateten, daudaun ne’e parte Polísia Nasionál Timor-Leste munisípiu Lautém atu halo invesigasaun ba akontesimentu ne’e.

“Ohin ha’u informa ona kazu ne’e ba ita-nia Polísia Lautém halo prosesu investigasaun, nune’e bele hatene sé mak sunu uma-tradisionál ne’e,” Autoridade munisipál tenik.

Joranlsita : Arminda Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here