Situasaun debate no votasaun OJE 2022 iha faze espesialidade, iha sala plenária Parlamentu Naasionál, segunda (13/12). Imajen TATOLI/António Gonçalves

DILI, 14 dezembru 2021 (TATOLI)–Parlamentu Nasionál (PN) liuhosi diskusaun no votasaun proposta lei Orsamentu Jerál Estadu (OJE) 2022 iha faze espesialidade, aprova verba ba Fundu Dezenvolvimentu Kapitál Umanu (FDCH, sigla portugés) ho montante millaun $12, ho rezultadu a-favór 45, kontra 1 no abstensaun 15.

Orsamentu aprovadu sei uza hodi realiza programa prinsipál haat hanesan kualifikasaun profisionál $1.027.800, formasaun téknika $3.567.543, bolsa estudu $6.533.064, outru tipu formasaun $871.593

Orsamentu ba FDCH laiha proposta adisionál tanba deputadu sira konsidera orsamentu ne’e sufisiente atu responde ba nesesidade kapitál umanu ba tinan oin.

Notísia relevante: OJE 2022, FDCH prevee millaun $12 finansia programa haat

Hahú tinan 2011 to’o 2020, FDCH fó ona bolsa estudu ba timor-oan hamutuk 6.401 hodi ba eskola iha rai-li’ur, ne’ebé hosi númeru ne’e, na’in-4.184 finaliza ona estudu, na’in-hitu mate,  na’in-269 nia kontratu kansela no falta de’it bolseiru 1.941 mak ativu.

Enkuantu estudante sira ne’ebé gradua ona, 3.328 hetan ona serbisu no 826 seluk seidauk.

Durante tinan 2016 to’o 2020, FDCH aloka ona orsamentu $60.224.057 ba bolsa estudu 4.312 durante tinan-tolu, ne’ebé la’ós abranje de’it ba funsionáriu públiku sira maibé públiku ein jerál, ne’ebé hosi totál ne’e, bolseiru 1.978 mak finaliza ona estudu no fila ona mai Timor-Leste no total 2.334 maka kontinua hela estudu.

Jornalista : Tomé Amado

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here