Ministru Administrasaun Estatál, Miguel Pereira de Carvalho. Imajen TATOLI/Francisco Sony

DILI, 14 dezembru (TATOLI)— Governu liuhosi Ministériu Administrasaun Estatál (MAE) hato’o ona opiniaun ka sujestaun ba Prezidente Repúblika, Francisco Guterres Lú-Olo kona-ba kalendariu eleisaun Prezidensiál 2022.

“Ami informa ona sujestaun Governu nian kona-ba kalendáriu eleisaun Prezidensiál 2022 ba Prezidente Repúblika, maibé Prezidente Repúblika sei rona mós Partidu Polítiku sira no parte hotu,hafoin Prezidente Repúblika utiliza nia kompetensia tomak atu dekreta kalendariu ba eleisaun prezidensiál,” Ministru Administrasaun Estatál (MAE), Miguel Perreira de Carvalho, hateten ba Jornalista sira iha Parlamentu Naisonál, tersa ne’e.

Notísia Relevante: MAE: eleisaun prezidensiál 2022 sei la’o ho forma imparsiál-neutru

Tanba, tuir Konstituisaun-Repúblika Demokratika Timor-Leste, Prezidente Repúblika mak iha kompeténsia ho baze ba artigu 86 (Kompeténsia kona-ba órgaun sira seluk), iha alínea c, hateten marka tuir lei loron eleisaun ba Prezidente-Repúblika no ba Parlamentu Nasionál.

Tanba ne’e, Governante ne’e dehan seidauk bele pronunsia sujestaun hosi Governu kona-ba kalendariu eleisaun tanba  kompetensia tomak iha Prezidente Repúblika nia liman.

MAE hamutuk ho órgaun eleitorál rua hanesan STAE no CNE, hahú halo preparasaun téknika hanesan resensiamentu eleitorál, akizasaun ba materiál votasaun no hala’o edukasaun sívika atu hasa’e tasa partisipasaun iha prosesu demokratiku ne’e.

“Ami informa ba Prezidente Repúblika, katak parte Governu no órgaun eleitorál hanesan STAE no CNE preparadu hasoru eleisaun prezidensiál tinan oin,” Governante ne’e garante.

Notísia Relevante: STJ seidauk rejista kandidatura ba Prezidente Repúblika

Iha eleisaun prezidensiál 2022, Governu sei aumenta sentru votasaun to’o 1.200, ne’ebé iha aumentu 27% no estasaun votu antes iha 1.500, maibé STAE propoin atu hasa’e ba 1.160.

Resensimentu eleitorál ho baze iha 2017 hamutuk eleitór 784.286, maibé iha ona aumentu eleitór atu tuir votasaun iha tinan oin (2022) hamutuk 850.487.

Kona-ba resensiamentu eleitorál iha diaspora hanesan, Koreia Súl, Irlandia Norte, Portugál inklui Reinu Unidu konsege rejista ona eleitór 7.000, ne’ebé la inklui timór-oan iha Austrália.

Nune’e, sentru votasaun no estasaun votu rua iha Portugál hanesan,ida iha Lisboa no  ida fali iha Portu, Austrália tuir planu iha Darwin, Koreia Súl sentru votasaun ida, Reinu Unidu estabelese sentru votasaun tolu.

STAE no CNE konklui ona rekrutamentu ba brigadista sira hamutuk 1.200 no iha tempu tuir mai sei rekruta mós ofisiál eleitorál hamutuk 15.000 atubele halo serbisu iha sentru votasaun no estasaun votu iha territóriu nasionál.

Notísia Relevante: Xefe Estadu promulga alterasaun lei eleitorál ba Prezidente Repúblika

Prezidente Repúblika sei dekreta kalendáriu eleisaun prezidensiál iha janeiru 2022

Jornalista : Natalino Costa

Editór        : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here