Governu prepara ona foos hodi distribui ba komunidade afetadu inundasaun iha Lagoa Tasi-tolu, (11/04/21). Imajen TATOLI/António Gonçalves

DILI, 14 dezembru 2021 (TATOLI)—Sentru Lojíztika Nasionál (CLN, sigla portugés) planeia ona halo akizisaun hosi nasaun viziñu, hodi akomoda konsumu nasionál, liuliu tama iha loron boot hanesan natál no tinan foun.

“Ita sei sosa foos tonelada 5.000 ho kustu millaun $4-resin hosi Tailándia tanba ita-nia foos iha armazenamentu nasionál Tibar mamuk ona,” Prezidente CLN, Jervazio Cardoso de Jesus da Silva, hateten, ba Agência TATOLI, iha ninia knaar fatin, Bebora, tersa ne’e.

Notísia relevante: Razaun akizisaun foos Vietname: inserteza situasaun emerjénsia no demanda konsumu nasionál aas

Foos importasaun tonelada 30.000 iha tinan 2020, daudaun ne’e laiha ona tanba Governu uza halo intervensaun merkadu no apoiu umanitáriu, ne’ebé ikus liu mak distribuisaun ba vítima inundasaun iha loron 04 abríl liubá.

Nune’e, haree ba stock nasionál laiha ona, CLN sei halo diskusaun ho parte Governu atu sosa foos iha fulan ne’e nia laran.

“Dalan alternativu ne’ebé ita uza mak iha tempu badak sei konvoka enkontru no tuur hamutuk ho empreza nasionál sira ne’ebé iha stoke iha armazen, hodi buka dalan antes ita-nia foos to’o mai, nune’e karik akontese buat ruma ne’ebé ita la espera hanesan dezastre naturál, ita bele halo intervensaun umanitária sedu,” nia dehan.

Maski nune’e, CLN seidauk identifika empreza atu koopera ba kestaun ne’e, maibé iha tempu badak sei iha koordenasaun di’ak.

Jornalista : Arminda Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here