Akizisaun foos faze dahuluk tonelada 6.000 atraka iha Portu Dili Ho ró MV. MY HUNG, iha kuarta (12/08). Imajen/MKAE

DILI, 21 agostu 2020 (TATOLI)-Prezidente Sentru Lojíztika Nasionál (CLN), Agusto Junior Trindade, hateten razaun Governu halo akizisaun foos hosi Vietname ho kuantidade tonelada 30.000 ho kustu millaun $15, tanba iha momentu situasaun emerjénsia Governu iha inserteza no demanda konsumu nasionál a’as.

“Pandemia afeta ba nasaun hotu iha mundu, inklui ita-nia rai rasik. Ho pandemia ne’e, nasaun esportadór boot hanesan Vietname Tailándia, no Kambódia hasoru hotu situasaun ne’e. Enkuantu ita iha inserteza bainhira maka bele hetan foos ruma no situasaun rai-laran obriga atu ita tenke halo akizisaun,” tenik Dirijente ne’e ba Agência Tatoli, foin lalais ne’e iha ninia knaar fatin, iha Mandarin.

Tuir nia, CLN nia programa prioridade atu garante merkadu ba produsaun rai-laran, tanba ne’e maka iha situasaun emerjénsia forma ekipa task force, kompostu hosi Ministériu Agrikultura no Peska (MAP) atu promove produsaun rai-laran, Sekretaria Estadu Kooperativa (SEKoop) halo grupu kooperativa no CLN hanesan merkadu.

“Ita-nia demanda foos boot, tuir kálkulu ne’ebé publika hosi boletin seguransa ai-han, hatudu katak tinan-ida ita-nia konsumu nasionál tonelada 139.000, fulan-ida konsumu nasionál hamutuk tonelada 11.142,” nia akresenta.

Notísia relevante: Akizisaun foos faze dahuluk tonelada 6.000 atraka iha Portu Dili

Tanba ne’e, bainhira situasaun emerjénsia kontinua maka produsaun rai-laran la to’o, tanba dadus ne’ebé publika hosi MAP, tinan-ida produsaun foos-rai iha tonelada 34.272.

“Bainhira ita halo kálkulu ba konsumu nasionál, produsaun rai-laran bele kobre de’it ba fulan-tolu, tanba ne’e la to’o ba tinan-ida tomak,” nia fó hanoin.

Nia subliña, Governu haree katak situasaun COVID-19 obriga Governu nia armajen labele mamuk no tenke iha rezerva sufisiente, nune’e bainhira situasaun kontinua, rai-laran labele falta ai-han.

“Hatama foos tonelada 30.000, la signifika ita hamate setór privadu sira, tanba Governu nafatin fó porsaun boot ba sira atu sira mós bele halo importasaun,” nia afirma.

Hahú 17 marsu Governu besik atu deklara Estadu Emerjénsia no sirkulasaun hosi Vietname katak sei suspende atividade esportasaun.

Iha 20 maiu, Konsellu Ministru deside autoriza CLN atubele halo akizisaun foos hosi Vietname no liuhosi Sentru Lojíztika ne’e maka halo prosesu aprovizionamentu, to’o 22 maiu asina akordu ho Vietname.

Prezidente CLN rekoñese, antes ne’e Primeiru-Ministru, Taur Matan Ruak la autoriza importa foos hosi rai-li’ur, ho razaun atubele promove no proteje produtu rai-laran, maibé realidade situasaun ne’e afeta mundu tomak inklui Timor-Leste.

Hahú janeiru to’o fevereiru 2020 bainhira situasaun normál, tuir dadus  hosi Autoridade Portuária Timor- Leste (APORTIL) katak ró ne’ebé atraka iha Portu Dili lori foos tama tonelada 14.000.

Nia konta tuir, hahú 17 marsu ba leten bainhira Estadu atu deklara Estadu Emerjénsia, demanda ba foos boot tebes, enkuantu importasaun foos tun.

“Hahú marsu ba leten kuaze laiha kompañia maka hatama foos. Hahu tinan-2018, CLN la hatama foos no ita iha de’it foos-rai ne’ebé ita hola hosi agrikultór lokál sira, dulas no tau iha rezerva (armajen CLN),” nia realsa.

Agusto Junior dehan, iha 2019 nia rohan, CLN iha tonelada 1.115 no tama iha 2020 komesa dulas hare ho kuantidade tonelada 613.

“Hodi totál ne’e maka ita utiliza barak ba intervensaun merkadu, lubuk ida ba programa dezastre naturál no balun ba apoiu ba umanitáriu ba orfonatu, padre no madre sira no seluk tan,” nia esplika.

MKAE konsidera presiza iha ai-han sufisiente atu garante stock nasionál

Sorin seluk, Ministru Koordenadór Asuntu Ekonómiku (MKAE), Joaquim Amaral, konsidera presiza iha ai-han sufisiente iha situasaun emerjénsia hodi garante stock nasionál

“Ita sente seguru tanba ita-nia armajen iha sasán iha laran, tanba ita ko’alia ai-han, presiza iha uluk maka ita bele garante seguransa stock nasionál,” nia subliña.

Tuir governante ne’e, funsionamentu stock nasionál atu halo intervensaun merkadu, nune’e labele iha grupu maka halimar folin.

“Folin iha merkadu tenke normál, bainhira iha dezastre no presiza urjente, Governu hakarak halo intervensaun stock foos no seluk bele ajuda programa Governu hanesan merenda eskolár no seluk tán,” nia akresenta.

Nia dehan, Governu nia stock importante tebes no planu halo akizisaun iha ona períodu emerjénsia, maibé foin maka to’o (foos tama ba faze dahuluk) tanba nasaun hotu hasoru pandemia COVID-19 no transporte la normál.

“La’ós signifika ita foin halo planu atu ba sosa, maibé planu ne’e iha ona uza osan fundu COVID-19,” nia akresenta.

Nia nota, iha situasaun fulan-tolu kotuk, to’o ai-moruk mós presiza husu husi rai-li’ur, maka Governu haree atu antisipa situasaun ne’e pior liután.

“Medida sira foti iha tempu ne’ebá no tenke sosa ai-han, aluga transporte, maibé sasán sira maka mai tarde, la’ós foin planeia agora, ita realiza de’it kontratu ne’ebé halo ona,” nia esplika.

Iha loron 12 agostu, akizisaun foos faze dahuluk hosi Vietname tonelada 6.000 atraka iha Portu Dili ho ró MV. MY HUNG.

Enkuantu ba faze daruak foos tonelada 12.500 sei to’o iha loron 21 agostu no ikus liu iha 30 agostu sei to’o tonelada 11.500.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here