Arsebispu Arkidioseze Metropolitana Dili, Dom Virgílio do Carmo da Silva prezide reuniaun dahuluk membro Konsellu Univesidade katolika timorense (UCT), sira. iha salaun nobel da paz, campus central, balide. tersa (14/12). Imajen/Egas Cristovão

DILI, 14 dezembru 2021 (TATOLI)—Arsebispu Metropolitana Arkidioseze Dili, Dom Virgílio do Carmo da Silva, iha tersa ne’e, fó pose ba membru estrutura ezekutiva Universitáriu Katólika Timorense (UCT, sigla portugés) São João Paulo II, ne’ebé hamahan iha Konsellu ida, hodi tau-matan no jere instituisaun ensinu superiór ne’e.

“Reitór labele halo serbisu boot mesak de’it relasiona ho programa universidade nian, maibé tenke rona hosi Asembleia Konsellu universidade,” Arsebispu Dom Virgílio, hateten, iha Kampus Sentrál, Balide.

Arsebispu Arkidioseze Metropolitana Dili, Dom Virgílio do Carmo da Silva, fó pose ba membru Konsellu UCT São João Paulo II, iha salaun Nobel da Paz, iha Kampus Sentrál, Balide, tersa (14/12). Imajen TATOLI/Egas Cristóvão

Estrutura ne’ebé simu pose hamutuk na’in-31, kompostu hosi grupu rua hanesan dahuluk Reitór universidade ho ninia vise no Dekanu ho ninia estrutura no daruak maka ba Na’i-ulun balun nu’udar eis titulár, polítiku no emprezáriu atu sai konselleiru ba universidade.

Iha loron 08 dezembru bainhira realiza seremónia lansamentu ba universidade, halo mós nomeasaun ba estrutura ezekutiva sira.

Notísia relevante: Universidade Katólika loke inskrisaun dahuluk ba estudante iha fevereiru 2022

Nune’e, hafoin seremónia ne’e ramata, membru ezekutivu sira hahú kedan ho enkontru dahuluk hodi halo planu prepara rekrutamentu ba dosente inklui prepara prosesu inskrisaun dahuluk ba kandidatu estudante foun ba tinan akadémiku 2022.

Arsebispu Arkidioseze Metropolitana Dili, Dom Virgílio do Carmo da Silva, fó pose ba membru Konsellu UCT São João Paulo II, iha salaun Nobel da Paz, iha Kampus Sentrál, Balide, tersa (14/12). Imajen TATOLI/Egas Cristóvão

Iha biban ne’e, Arsebispu Metropolitana Arkidioseze Dili agradese ba disponibilidade parte hotu hanesan José Ramos Horta, Milena Pires no Jorge Serano, ne’ebé tama iha estrutura ezekutiva universidade tanba maski okupadu ho serbisu maibé bele fó tempu hamutuk iha seremónia.

“Ba ita-boot sira-nia tempu hodi tulun universidade ne’ebé foin moris, nu’udar pasu ida atu kontinua mehi Dom Carlos no Dom Alberto Ricardo iha tinan hirak liubá,” Amu Bispu akresenta.

UCT São João Paulo II sei realiza prosesu ensinu aprendizajen aula prezensiál iha tinan oin ho maneira pre-universitáriu durante fulan-neen hodi prepara estudante universitáriu sira molok hahú aula.

Arsebispu Arkidioseze Metropolitana Dili, Dom Virgílio do Carmo da Silva, fó pose ba membru Konsellu UCT São João Paulo II, iha salaun Nobel da Paz, iha Kampus Sentrál, Balide, tersa (14/12). Imajen TATOLI/Egas Cristóvão

“Atu halo diferensa ida tenke iha maneira rasik. Tanba ne’e, Universidade Katólika ninia prosesu dahuluk ba fulan-neen sei hahú pre-universitáriu. Ita sei hahú ho kursu hodi prepara estudante sira molok tama ba eskola,” Amu Bispu dehan.

Dom Virgílio haktuir, bainhira Bispu sira iha inisiativa atu harii universidade ida, mai kedan ho hanoin tenke iha kór diferente ho universidade seluk atubele garante kualidade.

“Tanba ne’e ohin realiza ona mehi sira ne’e, ami sei la halibur ema barak maibé ami sei halibur ema oituan. Atu garante mehi ne’ebé Amu Bispu na’in-rua, husu atu Dirijente sira sériu iha prosesu rekrutamentu dosente no alunu sira ho didi’ak atubele la’o tuir planu ne’ebé trasa ona. Universidade Katólika la preokupa ho númeru estudante, maibé oinsá bele fó akompañamentu di’ak ba estudante sira,” Amu Bispu hameno.

Reitór UCT São João Paulo II, Padre Joel Casimeiro Pinto. Imajen TATOLI/Egas Cristóvão

Iha biban hanesan, Reitór UCT São João Paulo II, Padre Joel Casmiro Pinto, hateten, estrutura ne’ebé simu ona pose sei estabelese Asembleia ida, nune’e bainhira iha futuru iha planu no programa hosi parte ezekutivu, tenke hetan aprovasaun hosi Konsellu.

Nune’e, Reitór universidade privada ne’e konsidera momentu ne’e istóriku tanba bele forma ho Konsellu ezekutivu hosi Reitór, Vise-Reitór no Pro-Reitór sira, Kapelaun no Administradór Jerál, ne’ebé realiza ona enkontru ofisiál hafoin simu pose.

Universidade Katólika ne’e sei hahú ho fakuldade haat no kursu 11 inklui rua ne’ebé eziste ona.

Enkuantu, dosente sira prepara ona planu atu hahú ho pre-universitáriu, tanba dosente ne’ebé antes ne’e kontribui ona iha grupu traballu pedagójiku iha ICR, nune’e prontu ona kontribui hanorin.

Jornalista : Tomé Amado

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here