Seremónia inaugurasaun Universidade Katólika Timorense, São João Paulo II, iha Balide, tersa (08/12). Imajen TATOLI/Cidália Fátima

DILI, 08 dezembru 2021 (TATOLI)—Primeiru-Ministru, Taur Matan Ruak, no Arsebispu Arkidioseze Metropolitana Dili, Don Virgílio do Carmo da Silva, iha tersa ne’e, inaugura Universidade Katólika Timorense (UCT, sigla portugés) São João Paulo II, ne’ebé sei loke inskrisaun dahuluk ba estudante sira iha fevereiru 2022.

Reitór UCT, Padre Joel Casimeiro Pinto, hateten, universidade privadu ne’e prontu simu estudante foun ne’ebé hakarak kapasita-an liuhosi formasaun formál iha lisensiatura área peskiza no investigasaun.

“Ami sei tuur hamutuk filafali ho ekipa tomak hodi haree planu estratéjiku, saida mak bele alkansa iha tinan-lima oin mai no ba tinan 2022, tanba tuir planu fevereiru tinan oin ami sei hahú halo inskrisaun ba estudante foun,” Padre Joel Casimeiro Pinto, hateten, iha salaun UCT, iha Balide.

Notísia relevante: ANAAA espera ezisténsia Universidade Katólika kondisiona demanda graduadu ensinu sekundáriu

Polítika UCT ba estudante foun ne’ebé tama iha universidade ne’e, la diretamente hahú aula semestre dahuluk, maibé hahú aula ida hanaran pre-semestre durante fulan-neen hodi fó oportunidade tuir kursu lian portugés no inglés, hafoin hahú aula.

“Bainhihra aula la’o ona, estudante hotu sei ko’alia lian portugés no inglés iha aula laran, entaun estudante sira mai ne’e, mínimu tenke hatene lian rua ne’e,” Reitór universidade akresenta.

Aleinde ne’e, iha mós limitasaun ba estudante sira iha kada departementu ida, iha kuota ba ema na’in 25 to’o 30 de’it.

“Ita buka kualidade, la’ós kuantidade alunu, nune’e ba oin sei prepara rekezitu ruma ba estudante ne’ebé atu tama ba universidade ne’e,” Padre Joel Casimeiro Pinto tenik.

Universidade Katólika dahuluk ne’e daudaun hetan ona lisensiamentu hosi Governu, ba fakuldade Siénsia, Edukasaun, Arte no kultura, Siénsia Umana, Siénsia Saúde, no Enjiñaria Téknika Agrikola, ne’ebé kompostu hosi departementu 20, maibé daudaun loke uluk departementu balun de’it.

Iha dosente na’in-50 preparadu atu kontribui iha prosesu aprendizajen iha universidade ne’e, ne’ebé sei kolabora ho akademista sira hosi Portugal, Brazíl, Macau, Indonézia no seluk tan.

Iha fatin hanesan, Arsebispu Arkidioseze Metropolitana Dili, Don Virgílio do Carmo da Silva, hateten, mehi harii UCT iha tinan 20 liubá, hosi Don Carlos Filipe Ximenes Belo, ho kontinuasaun hosi Saudozu Don Alberto Ricardo da Silva, durante iha Dioseze Dili.

“Maski hanesan universidade katólika, maibé la halo diskriminasaun no nakloke ba ema hotu atu mai apreende siénsia ka buka matenek, maibé sei iha regulamentu, maneira no prinsípiu rasik,” nia hateten.

Tuir Bispu Dioseze Dili, UCT harii ho objetivu atu dezenvolve área edukasaun iha Timor-Leste.

Jornalista : Arminda Fonseca

Editora      : Julia Chatarina

PUBLISIDADEiklan

2 KOMENTÁRIU

  1. Boatarde. Hau iha ineterese konaba atu halao hau nia estudo iha Universidade katolika de sao Joao II,maibe antes ida ne’e hau bele hatene nia kriteria konaba registu nian, e informasaun ituan konaba semestre hira iha tinan (1) ?,no nia pagamentu ne kada semestre ne selu hira?,no atu hahu registu primeiru ne selu hira?.

    Diak Mak ne’e deit obrigdaa.

HAKEREK NO HATÁN

Please enter your comment!
Please enter your name here