Diretór Nasionál Empregu Exteriór SEFOPE, Filomeno Soares. Imajen TATOLI/Egas Cristóvão

DILI, 11 novembru 2021 (TATOLI)–Sekretaria Estadu Formasaun Profisionál no Empregu (SEFOPE) liuhosi Diresaun Nasionál Empregu Exteriór (DNEE), ne’ebé servisu hamutuk ho Korean Student Language Programme (KSLP), anunsia naran joven timor-oan ne’ebé liu ona teste ba kursu lian koreia.

Diretór Diresaun Nasionál Empregu Exteriór, Filomeno Soares, hateten, kada tinan sempre halo rekrutamentu ba timor-oan ne’ebé iha interese hakarak tuir kursu lian koreia, iha Human Resources Development (HRD) korea EPS Center, Becora.

Notísia relevante: Kandidatu traballadór 5.492 partisipa teste matéria lian koreia

“Tanba ne’e, iha loron 26 outubru 2021, timor-oan ne’ebé tuir teste atu tama kursu lian koreia hamutuk ema na’in-5.492, kompostu hosi feto 842 no mane 4.650, hosi kandidatu hirak ne’ebé tuir teste, rezultadu hatudu ema na’in-2.023 maka pasa, kompostu hosi feto 277 no mane 1.746,” Diretór Filomeno Soares hateten liuhosi nota ne’ebé Agência TATOLI asesu, kinta ne’e. ne’e.

Teste ne’ebé realiza hosi SEFOPE liuhosi DNEE fasilita de’it, maibé Ajénsia KSLP hosi Koreia maka responsabiliza ba prosesu selesaun to’o fó sai naran ne’ebé liu no la liu.

“Kandidatu sira ne’ebé liu ona sei fahe ba faze rua, faze dahuluk sei hahú tama kursu iha loron 24 novembru 2021 no faze daruak sei hahú kursu iha agostu 2022, ho durasaun kursu fulan-neen,” nia akresenta.

Jornalista : Arminda Fonseca

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here