Ministru Edukasaun Juventude no Desportu (MEJD), Armindo Maia, halo abertura ezame nasionál iha Eskola Ensinu Báziku Sentrál (EBC, sigla portugés), Farol, segunda (13/12). Imajen/MEJD

DILI, 13 dezembru 2021 (TATOLI)–Ministru Edukasaun Juventude no Desportu (MEJD), Armindo Maia, halo abertura ezame nasionál, segunda ne’e, iha Eskola Ensinu Báziku Sentrál (EBC, sigla portugés) Farol, ne’ebé iha biban ne’e enkoraja atu estudante sira hetan susesu.

“Ha’u enkoraja nafatin estudante finalista sira iha Eskola EBC Farol no territóriu tomak atu tau konsentrasaun didi’ak hodi bele ultrapasa prosesu ezame nasionál ne’e ho di’ak. Tanba prosesu ne’e mak sei determina futuru estudante sira. Ha’u fiar imi hotu iha preparasaun di’ak, ha’u fiar imi mós sei hetan susesu iha ezame nasionál ne’e. espera katak imi sei hakat tan pasu ida ba oin,” Ministru hateten hafoin halo abertura ezame nasionál iha Eskola Farol.

Notísia relevante: Estudante 58.224 iha territóriu nasionál sei partisipa ezame nasionál

Tuir governante ne’e, baibain ezame nasionál hamosu tensaun hodi halo estudante sira la hakmatek.

“Bainhira situasaun ne’e akontese, hatudu katak estudante laiha preparasaun másimu. Ema balun dehan ezame ne’e hanesan buat baibain ona no la presiza nakdedar, maibé balun nakdedar tanba la prepara-an. Estudante sira hanesan ne’e ita bele dehan atu ezame mak foin loke livru,” nia akresenta.

Nune’e, estudante eskola EBC Farol hamutuk 544 mak daudaun ne’e tuir ezame nasionál ne’ebé sei termina iha sesta ne’e.

“Naran katak susesu ne’ebé estudante iha territóriu nasionál, espesiál ba estudante eskola ne’e hetan la’ós tanba ajuda malu, maibé tanba iha preparasaun di’ak mak hatudu rezultadu di’ak, enkuantu laiha preparasaun másimu rezultadu mós sei baibain de’it,” nia akresenta.

Biban ne’e, Ministru apela ba estudante no profesór sira iha territóriu nasionál, katak iha prosesu ezame nasionál ne’e ida-idak hala’o responsabilidade.

“Buka kolabora di’ak ba malu hodi lori susesu iha ezame nasionál ne’e. Ba Diretór Koordenadór to’o mestre sira iha eskola hotu atu asegura nafatin konfidensialidade pontu ezame sira to’o prosesu ezame remata,” Ministru apela.

Estudante finalista sira ne’ebé tuir ezame nasionál kompostu hosi estudante finalista Ensinu Báziku terseiru siklu 90 ano, Ensinu Sekundáriu Jerál no Tékniku Vokasionál 120 ano inklui Ensinu Rekorrente.

Totál estudante finalista territóriu nasionál ne’ebé partisipa ezame nasionál ne’e hamutuk 58.224, kompostu hosi estudante Ensinu Báziku 31.143, Ensinu Sekundáriu 22.223, Ensinu Sekundáriu Tékniku Vokasionál 4.858, enkuantu hosi Dili de’it iha totál estudante 16.752.

Iha biban hanesan, Diretór Servisu Edukasaun Dili, Carlito Soares, hateten, maski ezame nasionál iha Dili realiza ona, maibé nia simu informasaun katak eskola balun daudaun ne’e enfrenta hela problema inundasaun, hanesan Eskola Finantil Comoro, ne’ebé área eskola nakonu ho bee, ne’ebé sala aula balun iha estudante kuaze 60 mak okupa.

“Eskola ne’ebé iha kondisaun bee nalihun maibé la fó impaktu ida ba prosesu ezame nasionál, hafoin sala aula ne’ebé estudante kuaze besik 60 mak okupa ne’e tanba kondisaun sala ne’e luan no bele akumula estudante ho númeru ne’ebé boot, ne’ebé problema sira ne’e parte edukasaun Dili buka rezolve neneik,” nia dehan.

Jornalista : Tomé Amado   

 Editora    : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here