Estudante Eskola Sekundáriu 04 Setembru UNAMET, Dili. Imajen TATOLI/António Gonçalves

DILI, 30 novembru 2021 (TATOLI)–Estudante finalista ensinu báziku terseiru siklu, sekundáriu jerál no tékniku vokasionál désimu segundu hamutuk 58.224 iha territóriu nasionál preparadu atu partisipa ezame nasionál.

Tanba ne’e, Ministériu Edukasaun Juventude no Desportu (MEJD) halo serbisu prodús matéria pontu ezame nasionál, nune’e semana oin estudante sira bele partisipa iha ezame.

Diretór Jerál Ensinu Báziku no Sekundáriu Tékniku Vokasionál hosi MEJD, Luís Manuel da Costa Fernandes, hateten, finalista ne’ebé atu tuir ezame nasionál, kompostu hosi ensinu báziku 31.143, ensinu sekundáriu jerál 22.223 no tékniku vokasionál 4.858.

“Ita rejista totál estudante iha territóriu nasionál hosi ensinu báziku to’o ensinu sekundáriu jerál no tékniku vokasionál hamutuk 125.981,” Dirijente ne’e informa iha ninia kaar fatin, Villa-verde, tersa ne’e.

Notísia relevante: MEJD hahú ona impresaun pontu ezame nasionál

Tuir Luís Manuel, hosi estudante 125.981, estudante 67.757 partisipa ona ezame pasajen klase no sei falta estudante 58.224 mak seidauk, tanba ne’e sei partisipa ezame nasionál iha dezembru nia laran.

Nune’e, Diresaun Unidade Kuríkulu nasionál daudaun ne’e halo hela ninia serbisu akompaña prosesu produsaun matéria iha sentru impresaun Comoro, ne’ebé tuir planu sei finaliza semana ne’e nia laran.

“Espera katak buat hotu bele la’o di’ak atu garante ezame ba estudante sira,” nia akresenta.

Jornalista : Tomé Amado

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here