Ministru Edukasaun Juventude no Desportu (MEJD), Armindo Maia, halo abertura ezame nasionál iha Eskola Ensinu Báziku Sentrál (EBC, sigla portugés), Farol, segunda (13/12). Imajen/MEJD

DILI, 13 dezembru 2021 (TATOLI)–Estudante finalista 81 iha munisípiu Dili la marka prezensa iha abertura ezame nasionál, iha sesta ne’e, ne’ebé antes ne’e, Dirijente eskola sira tenta halo konfirmasaun ho parte família maibé laiha informasaun.

Diretór Eskola Ensinu Sekundáriu Jerál (ESJ) Nicolau Lobato Comoro, Marcos Soares Paicheco, relata, númeru estudante finalista atu tuir ezame nasionál hamutuk 352, maibé na’in-340 de’it maka partisipa, kompostu hosi Siénsia Teknolojia 211 no Siénsia Sosiál Umana 129.

“Ita-nia estudante finalista na’in-12 la partisipa iha ezame nasionál, na’in-rua ho kondisaun saúde la permite no na’in-10 lakon informasaun to’o agora,” Diretór Eskola informa ba Agência TATOLI, iha Eskola ESJ Nicolau Lobato, Comoro.

Notísia relevante: MEJD enkoraja estudante finalista susesu iha ezame nasionál

Iha sorin seluk Diretór Eskola ESJ 05 maiu Becora, Manuel Verdial, hateten, bazeia ba dadus iha estudante finalista hamutuk 767 mak atu tuir ezame nasionál, maibé na’in-50 auzente, ne’ebé na’in-717 de’it maka partisipa.

“Ita kontinua rejista totál estudante finalista 767, tanba númeru ne’e rejista ona iha Ministériu Edukasaun Juventude no Desportu (MEJD), agora eskola kontinua buka tuir sira ne’ebé la tuir ezame,” nia akresenta.

Nune’e mós, Diretór Eskola ESJ, 12 novembru Becora, Aniceto Pedro da Costa, informa, eskola ne’e iha estudante finalista 670, maibé na’in-17 to’o agora laiha informasaun, tanba ne’e estudante na’in-653 mak partisipa iha ezame nasionál.

Enkuantu, Eskola Tékniku Vokasionál Hera iha estudante finalista hamutuk na’in-45, maibé na’in-43 de’it mak partisipa ezame nasionál no na’in-rua auzente.

Jornalista : Tomé Amado

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here