Misa loron-40 falesimentu Dom Basílio do Nascimento, iha Igreja Katedrál Baucau, villa antiga, sábadu (11/12). Imajen TATOLI/Natalino Belo

BAUCAU, 11 novembru 2021 (TATOLI)–Sarani sira hamutuk ho Amu-lulik Dioseze Buacau selebra misa loron-40 falesimentu Dom Basílio do Nascimento, ne’ebé prezide hosi Administradór Diosezanu Dioseze Baucau, Padre Alípio Pinto Gusmão, iha Igreja Katedrál Baucau.

Padre Parókia Santo António Baucau, Manuel da Silva Ximenes, hateten, selebrasaun ne’e iha momentu sarani sira prepara-an ba loron adventu, nune’e husu sarani sira prepara-an didi’ak atu simu kosok-oan Jesus Kristu.

“Dom Basílio husik ita tomak, família, kulturál no espirituál, maski nune’e ita laran metin nafatin ba ita-nia Jesus kristu nia kompromisu, katak ema ne’ebé fiar ha’u, maski mate maibé nia sei moris ba nafatin,” Padre Manuel hateten iha Igreja Katedrál Baucau, villa antiga, sábadu ne’e.

Vertude sasin Dom Basílio nian fiar no konfia iha Maromak tanba Nia rasik mós sente Maromak fiar no konfia, nune’e tau knaar sai Bibi-atan di’ak ba Dioseze Baucau hodi ukun durante tinan-25 nia laran to’o husik hela sarani sira.

Notísia relevante: Dom Basílio hakotu iis tanba enfrenta moras kardiovaskular

Administradór Diosezanu Dioseze Baucau, Padre Alípio Pinto Gusmão, kari aifunan ba rate Dom Basílio, hafoin ramata misa loron-40, iha Katedrál Baucau, villa antiga, sábadu (11/12). Imajen TATOLI/Natalino Belo

Nune’e, bainhira enfrenta situasaun krítiku iha Hospital Nacional Guido Valadares (HNGV), esforsu tomak doutór no médiku sira halo ona atu salva, maibé Maromak hadomi liu Dom Basílio.

“Dom Basílio fila hikas ba ida-ne’ebé fihir no ida-ne’ebé hadomi Nia no husik hela liasaun boot ba Amu lulik, Relijiosu no sarani sira, hanesan Amu laran-ruak, sai illas Maromak nian ne’ebé loos, nune’e lori sarani sira ba Maromak no lori Maromak ba sarani sira,” Padre Manuel akresenta.

Aleinde ne’e, Saudozu nunka halo deskriminasaun ba ema hotu, ne’ebé hatudu bainhira hakotu iis, relijiaun seluk mos partisipa tanba konsidera lakon Aman di’ak ida.

“Dom Basílio la’ós servisu ba kreda Katólika de’it, maibé nia mos hadomi ami,” Padre dehan.

Iha biban hanesan, Reprezentantes família, Julio Tilman, agradese ba Padre, Madre no sarani tomak Dioceze Baucau, ne’ebé durante tinan barak moris hamutuk ho Saudozu.

“Karik iha liafuan no hahalok ne’ebé la monu ba sarani sira-nia laran, hosi família hato’o deskulpa no husu atu kontinua reza ba Dom Basílio,” nia dehan.

Selebrasaun misa ne’e partisipa hosi Autoridade lokál, sivil no Militar munisípiu Baucau, família, Padre, Madre, Relijiosu no sarani Dioseze Baucau.

Bispu Dioseze Baucau, Dom Basílio do Nascimento, hakotu iis iha loron sábadu (30/10), iha HNGV, tanba moras kardiovaskulár.

Dom Basílio moris iha loron 14 juñu 1950, iha Suai no simu ordenasaun episkopál nu’udar Bispu iha loron 06 janeiru 1997 hosi Papa João Paulo II no lidera ona Dioseze Baucau durante tinan 25.

Jornalista : Natalino Belo

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here