O bispo de Baucau, Basílio Nascimento, em entrevista à agência Lusa fala sobre as eleições legislativas de 07 de julho, em Díli, Timor-Leste, 28 de junho de 2012. (ACOMPANHA TEXTO). ANTONIO AMARAL / LUSA

DILI,30 outubro 2021 (TATOLI) — Bispu Diozese Baucau, Dom Basílio do Nascimento hakotu iis iha Hospital Nacional Guido Valadares (HNGV) hafoin transporta hosi munisípiu Covalima tanba enfrenta moras kardiovaskular.

Iha loron 28 outubru 2021, Bispu Diozese Baucau ne’e hala’o misa ordenasaun ba Padre Indra Texeira no João Guterres iha Igreja Covalima. Nune’e iha loron 29 outubru Bispu sei dirije misa ba padre João Guterres no ohin dadeersan sei misa ba padre Indra Texeira.

Iha misa ohin dadeersan ne’e, Bispu Basílio hetan atakasaun kardiovaskular (moras fuan) no ekipa hosi Covalima transporta liuhosi aviaun mai aeroportu internasionál Nicolau Lobato, Dili.

Hosi aeroportu ekipa hosi saúde lori kedas ba HNGV maibé esforsu hosi médiku sira labele salva Bispu Dioseze Baucau ne’e.

Diákonu Claudino Mendonça Maia, informa Bispu durante ne’e moras kardiovaskular no atakasaun horikalan iha Covalima.

“Horikalan mak atakasaun maibé sente di’ak oituan no ohin dadeersan kontinua sei halo misa mak atakasaun fila-fali no trasporta kedas mai Dili iha oras 10:46  dadeersan no hakotu iis iha HNGV  oras 12:00 meudia,” Diákonu Claudino Mendonça Maia informa ba jornalista sira iha mortuáriu, sábadu ne’e.

Entretantu, Diretór HNGV, Doutór Marcelino Correia, fó-sai katak, Bispu Basílio hakotu iis tanba kauza hosi moras Kadiuvaskular.

“Amu sofre atakasaun fuan, tanba uluk opera fuan. Amu nia kondisaun moras tensaun, depois sira lori halai ba ospital Suai, nune’e sira komunika mai HNGV no haruka doutór espesialista ICU no pedagójiku hodi fó tratamentu maibé kondisaun ladi’ak nafatin,”

Maske HNGV haruka doutór espesialista ICU no pedagójiku ba Covalima maibé kondisaun saúde ladi’ak nafatin nune’e hola desizaun tenke haruka ba mai ospitál nasionál.

“Iha Aviaun laran Amu sei ko’alia, tún hosi avaiun Amu nia kondisaun derrepente grave tanba atakasaun maka’as, mai ospitál iha ICU maibé labele to’o hakotu iis”, tenik Doutór Marcelino Correia.

Daudaun ne’e mate-isin sei iha mortuáriu HNGV no orsida sei lori ba Igreja Katedrál, Vila-Verde hodi deside ba serimónia funebre.

Dom Basílio moris iha loron 14 jfulan-uñu tinan 1950 iha Suai no simu ordenasaun espiskopál nu’udár Bispu iha loron 6 fulan-janeiru 1997 hosi Papa João Paulo II no sai Nai-Lulik iha loron 25 fulan-juñu tinan 1977.

Tuir observasaun Agência TATOLI iha mortuáriu HNGV, sarani Katólika barak mak mak halibur malu hodi halo orasaun, maibé ho tristeza tanba Bispu dahuluk ne’ebé lidera Dioseze Baucau ne’e husik derrepente sarani Katólika iha territóriu nasionál.

Informasaun seluk ne’ebé Agência TATOLI rekolla hosi iha HNGV katak, prosesu funébre sei hein desizaun hosi Bispu Bioseze DiLI, Dom Virgílio Do Carmo da Silva no Bispu Dioseze Maliana, Dom Norberto Amaral.

Jornalista         : Felicidade Ximenes/Natalino Costa

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here