Deputadu sira aprova orsamentu ministériu iha debate no votasaun faze espesialidade, iha sala plenária Parlamentu Naasionál, sesta (10/12). Imajen TATOLI/António Gonçalves

DILI, 10 dezembru 2021 (TATOLI)–Parlamentu Nasionál (PN) aprova orsamentu tinan 2022 ba Ministériu Obra Públika (MOP) ho montante $160.431.417, iha faze diskusaun espesialidade ho rezultadu votu a-favór 44, kontra 0 no abstensaun 20.

“Nune’e, orsamentu ba Ministériu Obra Públika aprovadu,” Prezidente Parlamentu Nasionál, Aniceto Longuinhos Gutteres Lopes, hateten, iha sala plenária, sesta ne’e.

Orsamentu ne’e fahe ba saláriu no vensimentu $3.113.499, bens servisu $26.086.873, kapitál menór $1.046.096, kapitál dezenvolvimentu $23.184.949, no transferénsia públika $107.000.000.

Aleinde ne’e, verba ne’ebé prevee sei finansia programa lima hanesan estrada no ponte $32.873.534, dezenvolvimentu rurál urbana $3.624.246, boa-governasaun no jestaun instituisionál $16.933.637, água no saneamentu $17.000.000 no eletresidade $90.000.000.

Notísia relevante: MOP prevee milliaun $160 iha OJE 2022 ba programa lima

Iha dabate orsamentu ba MOP, Deputada Bankada Opozisaun CNRT, Maria Fernanda Lay no Deputadu Domingos Carvallho, aprezenta proposta ho númeru 144, atu hamenus orsamentu iha kategoria transferénsia públika ba Eletrisidade de Timor-Leste, Empreza Públika (EDTL, E.P), ho dotasaun inisiál $90.000.000, altera ka hasai $25.000.000, nune’e ho dotasaun finál $65.000.000.

Enkuantu, dotasaun inisiál ba kategoria despeza transferénsia públika $107.000.000, ho redusaun ne’e dotasaun finál $82.000.000.

Deputada proponente Maria Fernanda Lay, argumenta, razaun halo redusaun orsamentu ba EDTL, E.P tanba hanesan empreza públika bele ona sustenta-an ho reseita ne’ebé kobre hosi kliente liuhosi servisu fornesimentu enerjia eletrisidade.

Maski nune’e, Ministru Obra Públika, Salvador Eugênio Soares dos Reis Pires, defende orsamentu ba EDTL, E.P tenke mantein millaun $90 atu sustenta despeza operasionál, liuliu sentrál elétrika Hera no Betano, nune’e bele fornese enerjia eletrisidade ba komunidade iha territóriu nasionál, tanba instituisaun ne’e foin estabelese hanesan empreza públika, tanba ne’e ekonómikamente lori tempu hodi sustenta nia-an rasik.

Notísia relevante: Governu Deside EDTL Sai Empreza Públika

Aleinde ne’e, tuir Ministru, gastu ne’ebé previstu ba EDTL, E.P hamutuk millaun $180, reseitas purvolta millaun $40 ba tinan oin no iha saldo tranzitadu purvolta millaun $29-resin.

“Nune’e, bainhira ita soma hamutuk ho orsamentu ne’ebé fó mai Ministériu Obra Públika, liuliu ba EDTL ho millaun $90, hamutuk millaun $159, entaun sei falta millaun $22,4, loloos ne’e proposta adisionál karik ami simu, maibé redusaun entaun ami la simu,” Ministru dehan.

EDTL, E.P hanesan empreza públika ne’ebé iha autonomia finanseira, patrimoniál, administrativa, no judisiál ba ezekusaun atividade, tanba ne’e Ministériu Finansa (MF) no MOP mak aprova planu asaun no tuir lei kada tinan iha fulan-marsu tenke presta konta ba Kámara Konta, hanesan kondisaun ne’ebé prevee iha Dekretu-Lei Empreza Públika.

“Tanba ne’e, EDTL, E.P seidauk uza reseita no tuir planu ba tinan oin maibé tanba orsamentu diminui tebes, ita hanoin atu uza reseitas, maibé nia lala’ok atu uza reseita ne’e tenke konsulta ho lei, atu nune’e presta kontabilidade no labele iha aktu kontra lei ne’ebé vigora,” governante ne’e tenik.

Nune’e, iha votasaun, proposta 144 la pasa ho rezultadu votu kontra, 35, a-favór 25 no abstensaun 4.

Jornalista : Arminda Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here