Primeiru-Ministru, Taur Matan Ruak, prezide reuniaun Konsellu Ministru iha Palásiu Governu, kuarta (11/03). Imajen Tatoli/Egas Cristovão

DILI, 11 marsu 2020 (TATOLI)–Governu liuhosi reuniaun Konsellu Ministru (KM) deside ona Eletrisidade de Timor-Leste (EDTL) sai Empreza Públika.

Ministru Obra Públika, Salvadór Eugénio Soares dos Reis Pires, aprezenta Dekretu-Lei ba kriasaun Eletrisidade de Timor-Leste Empreza Públika (EDTL,EP), ne’ebé hetan aprovasaun husi ezekutivu sira ho respetivu estatutu.

“Ha’u aprezenta dekreru-lei rua, ida kona-ba estabelese EDTL sai hanesan Empreza Públika, ida seluk kria Autoridade Nasionál ba Elétrisidade. Ami aprezenta no aprova ona ho intensaun katak durante ne’e EDTL hanesan departamentu governamentál ida-ne’ebé maka atu halo atendimentu ne’ebé di’ak, kualidade sustentável maibé realidade iha burokrasia barak entaun ho meiu ida-ne’e hanoin bele hasa’e prestasaun servisu kualidade ba EDTL nian hanesan empreza atu lalais haree investimentu iha setór eletrisidade no mós prestasaun servisu rasik ba fornesementu enerjia eletrisidade ba povu”, informa Ministru Salvador iha Praça de Proclamação da Independéncia, Palásiu Governu, hafoin reuniaun KM, kuarta ne’e.

Notísia Relevante: Ezbosu Lei Transforma EDTL no DGAS ba Empreza Públika Iha Ona MRLAP

Governante ne’e refere liután, kona-ba Autoridade Nasionál ba eletrisidade maka hanesan atu asegura katak setór empreza públika ne’e mós hanesan entidade privada sira seluk ne’ebé hakarak investe iha setór eletrisidade sira no presta servisu ho kualidade no mós fó protesaun ba konsumidór sira.

Ministru Obra Públika, Salvador Soares dos Reis Pires. Imajen Tatoli/Egas Cristovão

Nia adianta, relasiona ho ahi-mate no halo sasán barak estraga, buat sira ne’e kuandu iha ona autoridade reguladór maka sei bele kria regulamentu sira hodi asegura katak EDTL no mós entidade sira seluk ne’ebé hakarak investe iha setór eletrisidade hanesan enerjia renovável sira.

Kona-ba funsionáriu EDTL rasik, tuir Ministru sei halo levantamentu dadus no sosializasaun ba funsionáriu sira.

Daudaun ne’e, funsionáriu EDTL hamutuk na’in-500 no sira sei hili opsaun rua.

“Sei haree meiu sé maka hakarak hela hanesan funsionáriu públiku no sé maka hakarak muda ba empreza públika.

Hafoin aprova dekretu-lei ne’e, Governu sei halo preparasaun durante tinan-ida, hahú husi tinan ne’e hodi halo tranzasaun, tuir diploma ne’ebé hetan aprovasaun no efetivamente sei hahú iha loron 1 janeiru 2021.

Jornalista: Antónia Gusmão

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here