Ministériu Edukasaun, Juventude no Desportu, Armindo Maia, distribui pontu ezame nasionál ba Diretór Servisu Edukasaun munisipál sira, iha Sentru Imprensaun Comoro, sesta (13/12). Imajen TATOLI/Tomé Amado

DILI, 10 dezembru 2021 (TATOLI)—Ministériu Edukasaun, Juventude no Desportu (MEJD) distribui ona matéria ezame nasionál ba Diretór Servisu Edukasaun munisipál sira.

Biban ne’e, Ministru Edukasaun, Juventude no Desportu, Armindo Maia, husu ba Diretór responsável sira atu asegura pontu ezame sira to’o munisípiu ida-idak ho di’ak.

“Ha’u husu ba diretór sira atu nafatin asegura konfidensialidade pontu ezame hodi garante matéria ezame sira nafatin ho kondisaun di’ak, nune’e iha segunda (13/12) iha abertura ezame nasionál ba estudante finalista 58.224 labele mosu problema,” Ministru Armindo hateten ba Diretór sira, iha Sentru Impresaun Comoro, sesta ne’e.

Notísia relevante: MEJD sei distribui pontu ezame nasionál iha loron 10 dezembru

Tuir governante ne’e, ezame nasionál nu’udar indikadór ba dezempeñu MEJD.

“Bainhira buat hotu di’ak sei foti ministériu nia naran, maibé kuandu ladi’ak ministériu nia naran sei foer. Maibé agradese tanba to’o agora ministériu seidauk simu informasaun negativu ida durante hala’o prosesu impresaun,” Ministru akresenta.

Prosesu impresaun pontu ezame iha sentru impresaun nu’udar pasu dahuluk MEJD uza ninia fasilidade rasik, tanba sentru ne’e iha kondisaun adekuadu hodi realiza prosesu impresaun.

Biban hanesan, Diretór Edukasaun munisípiu Viqueque, Emídio Amaral, garante sei asegura matéria pontu ezame ne’e to’o iha munisípiu sira.

“Viqueque iha postu lima no pontu ezame sira sei tau iha postu ida-idak, maibé asegura iha Polísia Nasionál Timor-Leste ninia fatin, nune’e iha segunda maka Diretór eskola sira sei ba foti hodi lori ba eskola ida-idak atu distribui ba estudante sira,” nia dehan.

MEJD gasta $148.179 prodús pontu ezame nasionál

Nune’e mós, Koordenadór Sentru Impresaun Comoro, Helder Aparício Guterres, hateten, sentru ne’e simu pedidu hosi unidade kurríkulu halo impresaun ba pakote matéria pontu ezame Ensinu Báziku no Ensinu Sekundáriu Tékniku Vokasionál ho durasaun serbisu fulan-ida.

Servisu Sentru ne’e ho misaun atu garante edisaun, dezeña gráfiku no impresaun ba matéria ba nível ensinu hotu ho kualidade, bazeia ba despaixu ministru, ne’ebé hasai iha loron 27 outubru  atu halo impresaun ba pontu ezame nasionál.

Diresaun ne’e konsege halo impresaun dokumentu sira hanesan termu abertura, lista prezensa, lista verifika folla no resposta sira.

MEJD gasta ona orsamentu ho montante $148.179 hodi halo imprensaun ba pontu ezame ba estudante finalista 58.224 iha territóriu tomak.

Orsamentu aloka ba sentru impresaun hodi sosa surat tahan, tinta, plat, stiker kaixa hamutuk $52.857,16, uza  konsumu pesoál 70 inklui seguransa $47.856,80, inklui insentivu ba pesoál 67 durante serbisu loron 36 ho kustu $48.240.

Tuir Koordenadór Sentru Impresaun, durante prosesu impresaun iha fulan-ida resin ne’e, serbisu sentru maka prepara no identifika totál lokál ezame hamutuk 652, sala ezame 2.769, envelope 16.902 no totál impresaun 809.986.

Hosi totál pontu ezame 809.986 ne’ebé sentru impresaun prodús, kategoria materiál báziku ba pre-eskolár hetan pontu ezame 19.150, Ensinu Báziku hetan pontu ezame 370.000, Ensinu Sekundáriu Jerál hetan 357.000, Ensinu Sekundáriu Tékniku Vokasionál hetan 55.610, Ensinu Rekorente hetan 8.136.

Enkuantu, matéria sira klasifika ba Ensinu Báziku iha modu A,B, Ensinu sekundáriu Jerál iha modu A,B no Ensinu Sekundáriu Tékniku Vokasionál iha de’it modu A, enkuantu Ensinu Eekorente laiha modu

Tuir Koordenadór sentru, durante hala’o serbisu impresaun pontu ezame ba estudante finalista sira iha territóriu nasionál ne’e akontese falla lubuk ida, maibé ho vontade no espíritu nasionalizmu no patriotizmu ne’ebé iha, ekipa konsege rezolve problema sira  ho di’ak no ohin bele realiza seremónia entrega.  

Jornalista : Tomé Amado

Editora     : Julia Chatarina   

PUBLISIDADEiklan

HAKEREK NO HATÁN

Please enter your comment!
Please enter your name here