Estudante Sekundáriu Nino Konis Santana Gleno. Imajen TATOLI/António Gonçalves

DILI, 06 dezembru 2021 (TATOLI)—Produsaun matéria ezame nasionál daudaun ne’e kuaze konklui, tanba ne’e Ministériu Edukasaun Juventude no Desportu (MEJD) prepara ona prosesu distribuisaun pontu ezame nasionál ba eskola sira iha territóriu nasionál.

Diretór Jerál Administrasaun no Finansa MEJD, Antóninho Pires, relata katak prosesu distribuisaun pontu ezame nasionál sei realiza iha loron 10 dezembru 2021, ne’ebé ezame sei akontese iha fulan ne’e nia laran.

“Ita-nia produsaun pontu ezame nasionál ne’e atinje ona 90%, ne’ebé ita deside sei distribui iha sesta agora,” Diretór Jerál, hateten, iha salaun MEJD, Villa-verde, segunda ne’e.

Notísia relevante: Estudante 58.224 iha territóriu nasionál sei partisipa ezame nasionál

Ministériu sei entrega direta ba reprezentante kada eskola sira iha munisípiu, nune’e bele iha posibilidade to’o sedu iha ida-idak ninia eskola tanba loron 13 dezembru, eskola hotu iha Timor-Leste sei realiza ezame nasionál.

MEJD rejista ona estudante 58.224 iha territóriu nasionál mak sei partisipa ezame nasionál.

Aleinde ne’e, ministériu kada tinan sempre halo sensibilizasaun, liuliu kontinua fó oportunidade ba alunu sira ne’ebé mak hasoru problema isin-rua.

“Ministériu Edukasaun fó tempu ba sira atu filafali ba eskola, nune’e bele ramata estudu, maibé depende ba inan-aman no parte eskola, oinsá konkordánsia atu haree asuntu ne’e hodi bele rezolve ho didi’ak,” nia akresenta.

Jornalista : Tomé Amado

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here