Ministru Agrikultura no Peska, Pedro dos Reis, no Embaixadór Brazil ba Timor-Leste, Maurício Medeiros Assis, asina akordu kooperasaun. Imajen/WFP

DILI, 10 dezembru 2021 (TATOLI)–Governu Brazil kontribui orsamentu $120.000 ba Timor-Leste liuhosi Ministériu Agrikultura no Peska (MAP) no Programa Ai-han Mundiál (WFP, sigla inglés), hodi fó asisténsia umanitária apoia melloramentu produtividade ortikultura no pekuária.

Embaixadór Brazil ba Timor-Leste, Maurício Medeiros Assis, hateten, kontribuisaun ne’e sei utiliza atu tulun vítima inundasaun nia moris loron-loron liuhosi atividade sira ne’ebé bele hatama rendimentu.

“Ha’u kontente bele lansa programa ho Ministériu Agrikultura no Peska no Programa Ai-han Mundiál, tanba Brazil prontu haforsa koordenasaun no parseria serbisu, hamutuk ho Nasaun Unida atu ajuda Timor-Leste atinje meta Objetivu Dezenvolvimentu Sustentável (ODS) 2030 inklui hakotu hamlaha no halo transformasaun ba sistema ai-han,” Diplomatan ne’e dehan liuhosi nota ne’ebé Agência TATOLI asesu, sesta ne’e.

Notísia relevante: Vítima inundasaun iha alojamentu provizóriu laiha ai-han atu konsumu

Nune’e, liuhosi konesaun MAP ho entidade merkadoria, iha ona planu atu tulun no fasilita grupu to’os-na’in sira, mobiliza produ hosi munisípiu bá kapitál Dili.

Iha biban hanesan, Ministru Agrikultura no Peska, Pedro dos Reis, konsidera inisiativa ne’e importante tebes atu hadi’a populasaun sira-nia atividade moris loron-loron.

“Lori Governu nia naran, hakarak agradese ba Governu Brazil nia apoiu. Ministériu Agrikultura no Peska kontinua iha vontade atu serbisu hamutuk ho parseiru dezenvolvimentu sira iha setór agrikultura no peska, atu atinje objetivu komún ne’ebé ita hotu hakarak,” nia akresenta.

Kontribuisaun ne’e ninia objetivu atu mellora produtividade ortikultura no pekuária, ho grupu to’os-na’in sira, hodi fó benefísiu direta ba distribuisaun fini, pestisida, adubu, no ekipamentu serbisu ba agrikultór.

Fundu benefisia grupu to’os-na’in 11

Ministru Pedro dos Reis, informa, fundu ne’e sei tulun benefisiáriu sira liuhosi MAP atu sosa animál hodi haki’ak no fó kapasitasaun kona-ba jestaun pekuaria, nune’e grupu to’os-na’in hamutuk 11 no totál benefisiáriu direta hamutuk 193 ne’ebé afetadu dezastre naturál iha fulan-abríl liubá bele halo atividade pekuária ba períodu fulan-neen.

“Ita hatene problema seguransa ai-han no má nutrisaun iha Timor-Leste kontinua sai dezafiu boot, ho númeru signifikante sofre ba inseguransa ai-han, labarik tinan-lima mai kraik ho rasa badak hamutuk 47%, krekas 8,6%, no todan menus hamutuk 32%, inklui totál feto ho idade reprodutiva hamutuk 30% mak sofre hisi anemia,” Ministru dehan.

Espesifikamente, impaktu inundasaun no COVID-19 sai kauza boot ba inseguransa ai-han no lakuna nutrisaun iha Timor-Leste, ne’ebé situasaun ne’e afeta maka’as ba seguransa ai-han, korrente fornesimentu, no funsionamentu merkadoria.

Tuir relatóriu asesmentu impaktu sósiu-ekonómia hosi Governu, iha uma-kain hamutuk 31.000-resin iha Timor-Leste afetadu inundasaun no rai agrikultór hamutuk ektare 2.660 mak hetan estragu, ho situasaun ne’e folin ai-han sa’e no rendimentu tun maka’as, uma-kain hamutuk 38% mak tenke redús kualidade ai-han tanba menus osan ka rekursu no populasaun hamutuk 21% mak hetan rendimentu kiik tenke hamenus hahán.

Nune’e mós, Reprezentante interinu WFP Timor-Leste, Ashley James Rogers, hateten, WFP nu’udar organizasaun umanitáriu boot liu iha mundu, ne’ebé salva moris iha situasaun emerjénsia, harii prosperidade no suporta futuru sustentável ba ema hirak ne’ebé rekupera hosi konflitu, dezastre no impaktu hosi mudansa klimátika.

“Ami agradese ba kontribuisaun jenerozu hosi Brazil ne’ebé tulun ona Timor-Leste. Inisiativa ne’e sei ajuda komunidade no grupu to’os-na’in sira hodi rekupera fali hosi inundasaun ne’ebé akontese iha fulan-abríl liubá,” Ashley James tenik.

Jornalista : Arminda Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here