Atividade edukasaun sívika iha Eskola Ensinu Sekundáriu Jerál 04 setembru Viqueque, iha Viqueque villa, sesta (10/12). Imajen TATOLI/Vitorino Lopes da Costa

VIQUEQUE, 10 dezembru 2021 (TATOLI)—Komisaun Nasionál Eleisaun (CNE, sigla portugés) hala’o edukasaun sívika kona-ba aktu eleitorál durante loron-lima, ba estudante no entididade relevante iha Viqueque, ne’ebé iha sesta ne’e realiza iha Eskola Ensinu Sekundáriu Jerál 04 setembru Viqueque.

“Ohin, ami ekipa ida hamutuk ho Sekretariadu Tékniku Administrasaun Eleitóral (STAE) hala’o edukasaun sívika ba loron ikus iha munisípiu Viqueque. Maibé la’ós hotu iha ne’e de’it, sei iha kontinua programa hanesan atu prepara ba Eleisaun Prezidensiál,” Komisáriu CNE, Olávio da Costa Monteiro Almeida, hateten, Agência TATOLI, iha salaun eskola 04 setembru, Viqueque villa, kinta ne’e.

Notísia relevante: CNE-STAE halo edukasaun sívika ba estudante Santo Estevão Viqueque

Edukasaun sívika ho tema “promove esklaresimentu kona-ba aktu eleitorál no eleisaun ne’ebé reziliente ho COVID-19”, ne’ebé ho objetivu atu aumenta koñesimentu estudante sira kona-ba lala’ok eleisaun.

Tuir Komisáriu CNE, Eleisaun Prezidensiál ne’ebé sei realiza iha marsu 2022 sai eventu importante ba nasaun, tanba ne’e sidadaun hotu tenki partisipa másimu.

“Maski ohin loron ita iha situasaun pandemia, maibé nafatin realiza Eleisaun Prezidensiál no kontinua Eleisaun Parlamentar iha tinan 2023,” akresenta.

Iha fatin hanesan, Eskola Ensinu Sekundáriu Jerál 04 setembru, Virisimo Marques da Silva, konsidera atividade ne’e importante hodi partilla informasaun sira kona-ba eleisaun.

Antes ne’e, CNE hala’o ona edukasaun sívika iha Eskola Ensinu Sekundáriu Katóliku Santo Estevão iha postu Ossu, Ensinu Sekundáriu Jerál Calixa iha postu Lacluta no fatin seluk tan.

Atividade ne’e partisipa hosi Diretór STAE no Diretór CNE Viqueque no estudante hamutuk na’in-120.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here