Traballadór sira habai hela kafé iha sentru habai kafé CCT nian iha Railaco, kinta (09/07). Imajen TATOLI/António Gonçalves

DILI, 26 novembru 2021 (TATOLI)–Ministru Koordenadór Asuntu Ekonómiku (MKAE), Joaquim Amaral, informa, tempu badak Ministériu Agrikultura no Peska (MAP) sei haruka tan kafé kontetór ida ba Dubai.

“Ita-nia kafé iha Dubai atrai tebes vizitante sira iha Expo Dubai tanba kafé orgániku tebes, ne’ebé semana ida ka rua tan, MAP sei haruka kafé kontetór ida ne’ebé prontu ona atu haruka ba Dubai,” Ministru informa ba Agência TATOLI, foin lalais ne’e iha Palásiu Governu.

Kafé ne’ebé sei exporta la’ós ba ezpozisaun de’it, maibé atu fa’an ba konsumidór sira ne’ebé gosta kafé orgániku.

“Ita-nia prezensa iha Dubai to’o marsu 2022, ne’ebé iha oportunidade lubuk ida fó informasaun ba vizitante sira relasiona ho potensialidade investimentu ne’ebé investidór sira presiza hatene atu mai ita-nia rai,” nia dehan.

Notísia relevante: MTKI-MAP lansa projetu hasa’e rendimentu hosi exportasaun produtu agríkola

Antes ne’e, Governu liuhosi Ministru Turizmu, Komérsiu no Indústria (MTKI) no MAP  halo lansamentu ba projetu hasa’e rendimentu liuhosi exportasaun produtu agríkola sustentavél hanesan kafé, Cacao, Baunila, pimenta, craviño no temperu.

Expo Dubai 2020 realiza iha Dubai, iha Emiradu Árabe Unidu, iha loron 01 outubru 2021 no loron 31 marsu 2022 no hanesan espozisaun mundiál dahuluk iha Médiu Oriente.

Timor-Leste lori produtu hamutuk 50-resin hodi aprezenta iha espozisaun no komersializa produtu hamutuk 100 resin, kompostu hosi produtu agríkola, artezanatu, minerál no tais Timór.

Jornalista : Arminda Fonseca

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here