Vise Primeiru-Ministru no Ministru Planu no Ordenamentu, José Maria dos Reis. Imajen TATOLI/Francisco Sony

DILI, 09 dezembru 2021 (TATOLI)–Vise Primeiru-Ministru no Ministru Planu no Ordenamentu (MPO), José Maria dos Reis, konvoka enkontru ho Prezidente Autoridade no Administradór munisipál, hodi diskute prosesu reajustamentu Planu Estratéjiku Dezenvolvimentu (PED) 2011-2030.

“Ministériu Planu no Ordenamentu nia responsabilidade ba PED mak ba planeamentu estratéjiku no ordenamentu territóriu ne’ebé interligadu no interdependente. Timor-Leste kompleta tinan 20 restaura independénsia, ne’ebé konsege hetan avansu ho dezenvolvimentu barak, maibé nafatin hasoru dezafiu boot oin-oin hanesan kiak no mukit, dezigualidade, no dependénsia ekonómika ba setór minarai,” Ministru hateten liuhosi nota ne’ebé Agência TATOLI asesu, kinta ne’e.

Governante ne’e konsidera, dezafiu ne’ebé hasoru sai vizivel no grave liután bainhira tama situasaun pandemia no dezastre naturál, hanesan inundasaun iha loron 04 abríl liubá, ne’ebé iha loron ida bele repete tan no fó ameasa ba povu nia-moris no prosesu dezenvolvimentu nasaun.

Notísia relevante: Reajustamentu PED 2011-2030 hodi adapta realidade ohin loron

Tanba ne’e, atu minimiza impaktu sira, VIII Governu Konstitusionál haree katak iha nesesidade atu reajusta planu estratéjiku hodi responde di’ak liután ba nesesidade atuál no risku futuru sira, ne’ebé deside liuhosi rezolusaun númeru 81/2021, 21 juñu atu harii komisaun interministeriál ba reajustamentu PED 2011-2030.

“Inisiativa ne’e ho objetivu atu garante katak estratejia foun ne’ebé sei re-define, bele hetan konsensu nasionál atu instrumentu ne’e sai vinkulativu ba ema hotu no projesaun nasionál, garante koezaun no estabilidade nasionál, atu nune’e instrumentu ida-ne’e bele hetan implementasaun rigorozu,” nia akresenta.

Maski nune’e, reajustamentu PED sei konsidera mós progresu di’ak ne’ebé atinje ona no foti lisaun hosi implementasaun antes ne’e.

Programa VIII Governu no planu rekuperasaun ekonómika hodi mellora liután medida estratéjiku sira atu sai integradu no iha balansu di’ak liu entre dimensaun sosiál, ekonómiku, no ambientál, bazeia ba potensialidade territoriál no prinsípiu direitu umanu.

Reajustamentu PED mós integra aspeitu ordenamentu territóriu ne’ebé mós iha prosesu estudu no elaborasaun nia-laran hodi bele integra di’ak liután medida estratéjiku, garante jestaun rekursu no dezenvolvimentu ho maneira sustentável.

Nune’e, sei inklui mós planu operasionál ida ho ninia orsamentu indikativu atubele sistematikamente orienta ninia implementasaun hodi atinje rezultadu prazu badak, médiu no naruk, hodi kombate pobreza no mellora kualidade povu tomak nia-moris no bem-estar.

Iha ámbitu ne’e, Vise Primeiru-Ministru konsidera Autoridade munisipál sira nia papel fundamentál tebes ba realizasaun konsultasaun públika iha nível munisipál hodi rekolla opiniaun hosi pesoál no reprezentante sira hosi entidade no komunidade oioin iha munisípiu hotu, ba reajustamentu PED, Planu Nasionál Ordenamentu Territóriu no Planu Munisipál Ordenamentu Territoriál.

Iha sorin seluk, iha mós aprezentasaun hosi Unidade Planeamentu Monitorizasaun no Avaliasaun (UPMA) kona-ba rezultadu pre-limináriu avaliasaun PED faze II (2016-2020), ne’ebé kobre progresu ne’ebé atinje ona, dezafiu, no rekomendasaun sira ba melloramentu.

Aprezentasaun téknika hosi Sentru Planeamentu Integradu kona-ba konseitu no estrutura pre-limináriu ba grande medida estratéjika, nu’udar matadalan ba diskusaun no konsulta públika.

Iha oportunidade ne’e, Prezidente Autoridade no Administradór munisipál sira hato’o preokupasaun oioin inklui asuntu relasiona ho bee no saneamentu, irrigasaun, estrada, edukasaun, saúde, arte no kultura, agrikultura, turizmu, dezorganizasaun sidade no dezentralizasaun, ne’ebé tenke hetan atensaun no investimentu hodi bele mellora povu nia moris.

Nune’e, bele diversifika fonte reseita Estadu tanba daudaun ne’e depende de’it ba fonte únika hanesan fundu petrolíferu ne’e la sustentável, tanba ne’e partisipasaun no kontribuisaun sira ne’e importante tebes ba prosesu reajustamentu PED hodi garante katak prosesu inkluzivu.

Jornalista : Arminda Fonseca

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here