Primeiru Ministru, Taur Matan Ruak. Imajen TATOLI/Francisco Sony

DILI, 26 novembru 2021 (TATOLI)–Primeiru-Ministru (PM), Taur Matan Ruak, prezide reuniaun Komisaun Interministeriál ho Pontu Fokál Departamentu Governamentál ba reajustamentu Planu Estratéjiku Dezenvolvimentu (PED) 2011-2030.

“Revizaun PED ne’e importante atubele atualiza, hadi’a no adapta tuir realidade ohin loron nian, nune’e bele sai hanesan dokumentu mata dalan ba Governu iha dezenvolvimentu sira ba oin tuir metas ne’ebé define, ho karatér independentemente, ne’ebé bainhira partidu se mak ukun, importante iha enkuadramentu legál atu guia Governu halo dezenvolvimentu tuir planu ne’e,” Xefe Governu hateten iha ámbitu reuniaun ne’ebé hala’o iha auditorium Ministériu Finansa (MF), sesta ne’e.

Notísia relevante: Fulan ne’e, Governu hahú konsulta públiku prosesu reajustamentu PED iha suku 138

Tuir PM, tempu ona no iha nesesidade halo reajustamentu ba PED atubele hadi’a no atualiza dokumentu.

“Tanba ne’e husu ba Diretór jerál, nasionál no Xefe departamentu sira ne’ebé indikadu hanesan pontu fokál atu partisipa másimu fó kontribuisaun opiniaun no ideia ba dokumentu ne’e, tanba kargu xefia iha esperiénsia tinan barak kona-ba planeamentu,” nia akresenta.

Iha biban hanesan, Vise Primeiru-Ministru no Ministru Planu no Ordenamentu (MPO), José Maria dos Reis, konsidera iha razaun balun importante atu hahú prosesu reajustamentu PED 2011-2030, tanba planu ne’e liu ona faze tolu, ne’ebé faze dahuluk kurtu prazu tinan 2011-2016, faze daruak médiu prazu tinan 2016-2020, no faze datoluk longu prazu tinan 2022-2030.

“Faze rua liu ona, agora tama iha faze datoluk, ne’ebé iha ona avaliasaun PED ne’e rasik hatudu katak iha progresu balun la’o hela, balun atinje ona, balun seidauk atinje no balun mós seidauk hahú. Tinan 10 liu ona, ho tan kalamidade ne’ebé mak ita hasoru no pandemia boot durante tinan rua, fó impaktu boot ba prosesu dezenvolvimentu ne’e rasik,” governante ne’e dehan.

Nune’e, komisaun sei halo konsultasaun  ba eis titulár, líder orgaun soberanu, líder Igreja Katólika, no konfisaun relijioza sira seluk, sosiedade sivil,  partidu polítiku, setór privadu, autoridade lokál, parseiru dezenvolvimentu, péritu nasionál no internasionál, veteranu, juventude, grupu defisiente no vulnerável inklui komunidade.

Aleinde ne’e, sei halo mós semináriu nasionál  hodi rona opiniaun hosi parte hotu molok elabora ba  dokumentu hodi aprezenta ba Konsellu Ministru hodi aprova no lori ba Parlamentu Nasionál diskute no aprova hanesan dokumentu nasionál PED reajustadu.

Komisaun ba reajustamentu ne’e lidera hosi Primeiru-Ministru, Vise Primeiru-Ministru no Ministru Planu Ordenamentu, Vise Primeiru-Ministru no Ministra Solidariedade Sosiál no Inklui (MSSI), Armanda Berta, Ministru Koordenadór Asuntu Ekonómiku (MKAE), Joaquim Amaral, Ministru Administrasaun Estatál (MAE), Miguel Perreira de Calvalho, Ministru Prezidénsia Konsellu Ministru, Fidelis Manuel Leite Magalhães, Ministra Negósiu Estranjeiru no Kooperasaun, Adaljiza Albertina Xavier Reis Magno.

Enkuantu iha parte tékniku , komisaun ne’e lidera hosi Sentru Planeamentu Integradu, ho supervizaun hosi Vise Primeiru-Ministru Jose Reis hamutuk ho Unidade Planeamentu, Monitorizasaun no Avaliasaun (UPMA) no Universidade Nasionál Timor-Lorosa’e (UNTL).

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here