Espoza Primeiru-Ministru, Taur Matan Ruak, Isabel da Costa Ferreira. Imajen/CQR

DILI, 05 agostu 2020 (TATOLI)–Bazeia ba artigu 6 Lei 7/2007 25 jullu kona-ba estatutu titulár órgaun soberania, Primeiru-Ministru (PM) hanesan órgaun soberanu ida tenke deklara riku-soin família.

Tanba ne’e iha kuarta ne’e, espoza PM Taur Matan Ruak, Isabel da Costa Ferreira, aprezenta riku-soin família Primeiru-Ministru ba Tribunál Rekursu.

“Ohin ha’u mai aprezenta no halo deklarasaun riku-soin família Primeiru-Ministru ne’ebé hanesan mós Ministru Interiór iha Tribunál Rekursu, tanba  tuir Lei 7/2007 kona-ba deklarasaun ba titulár sira katak ukun-nain sira sé de’it maka simu pose sai hanesan Prezidente Repúblika, Primeiru-Ministru, Ministru no Deputadu sira tenke mai deklara sira-nia riku-soin  iha Tribunál Rekursu tanba bazeia ba lei,” dehan Espoza PM Taur hafoin aprezenta riku-soin iha Tribunál Rekursu, iha Caicoli.

Riku-soin ne’ebé ohin aprezenta maka hanesan uma, karreta no osan ne’ebé maka rai iha banku tanba tinan-tinan sempre iha mudansa.

“Ha’u mai aprezenta ami-nia uma, karreta no mós hanesan ami-nia osan ne’ebé ami rai iha banku. Deklarsaun ne’e ami halo desde atuál Primeiru-Ministru sai Prezidente Repúblika, ami mai deklara kada tinan tanba sempre iha mundansa,” nia akresenta.

Nia dehan, iha aprenzentasaun ne’e Prezidente Tribunál haree katak laiha mundansa ba parte patrimóniu hanesan uma, karreta maibé iha mudansa maka ba saldo konta bankária.

“Dalaruma saldo menus ka aumenta entaun Tribunál tenke hatene, nune’e mós ba ami-nia oan sira liuliu ha’u-nia oan feto boot ne’ebé agora nia halo ona tinan 17 ne’e, nia iha ona konta mesak entaun ida ne’e mós mudansa ida. Tanba ne’e ami tenke mai deklara,” nia realsa.

Totál depózitu ordén partikulár PM iha Banku Nasionál Ultramarinu (BNU) ho totál $454,85 no kaixa jerál depózitu sukursal iha BNU Timor hamutuk $79.755,43 iha loron 03 agostu 2020.

Espoza PM, Isabel da Costa Fereira, ho totál saldo depózitu ordén partikulár iha Banku Mandiri hamutuk $3.781,00, depózitu ordén poupansa iha Banku Mandiri $2.737,00, iha Banku Westpac Corportation $7.395,00, Internasional Bearing Deposit ho totál $12.650,20, no totál saldo depózitu ordén partikulár iha Banku KCP Atambua hamutuk $33.000,00 iha loron 03 agustu 2020.

Totál saldu iha konta bankária ba oan dahuluk, Lola Ruak Ferreira de Vasconcellos, iha BNU $25.312 no totál saldo iha bandu Mandiri hamutuk $3.543,00.  

Enkuantu, saldo ba oan daruak, Quasadhip Bento de Vasconcellos Ferreira Ruak, totál saldo iha BNU Timor hamutuk $150,00, saldo konta “Hau nia futuru” $ 23,036.37, no totál saldo iha Banku Mandiri hamutuk $ 3,543.

Totál saldo ba oan datoluk, Albertina Francisco Tanarisa de Vasconcellos Fereira Ruak, iha Banku BNU $150,00, saldu konta “Hau nia futuru” hamutuk $19.649,06, no saldo iha Banku Mandiri hamutuk $3.543,00, iha loron 03 agostu 2020.

“Ha’u hanoin konta bankária sira ne’e la’ós ba númeru ida a’as liu, maibé tuir duni ami-nia kapasidade finanseiru ne’ebé iha, hosi ami-nia serbisu ne’ebé durante ami halo” nia subliña.

Kona-ba patrimóniu rai, iha rai ne’ebé lokaliza iha Metiaut, Postu Administrativu Cristo Rei, iha Dili ho metru 18.000, rai ne’ebé lokaliza iha Suku Ossu-Una, Postu Administrativu Baguia, Munisípiu Baucau.

Nune’e mós, rai ho medida metru 47.000 lokaliza iha Suku Letefoho, Postu Administrativu Same, Sidade Same, Munisípiu Manufahi no ikus liu maka rai ektare 130 lokaliza iha Suku Betano, Postu Administrativu Same, Munisípiu Manufahi.

Kona-ba patrimóniu veíkulu maka hanesan Land Rover, Toyota Mitsubishi, no Toyota Avansa.

Jornalista: António Gusmão

Editora: Julia Chatarina

HAKEREK NO HATÁN

Please enter your comment!
Please enter your name here