Diretór Ezekutivu ANAAA, Edmundo da Silva Viegas. Imajen TATOLI/Egas Cristóvão.

DILI, 23 agostu 2021 (TATOLI)–Ajénsia Nasionál ba Avaliasaun no Akreditasaun Akadémika (ANAAA) apresia ho inisiativa Igreja Katólika ne’ebé hakarak harii Universidade Katólika Timorense (UCT, sigla portugés) no iha espetativa bele kondisiona demanda graduadu ensinu sekundáriu.

“Haree ba graduadu hosi ensinu sekundáriu kada tinan sa’e ba bebeik, maibé universidade sira-nia kapasidade seidauk ekilibradu ho demanda ne’ebé mai hosi ensinu sekundáriu, tanba ne’e ho ezisténsia Universidade Katólika, espera bele aumenta kapasidade simu graduadu sira hosi ensinu sekundáriu,” Diretór Ezekutivu ANAAA, Edmundo da Silva Viegas, hateten, ba Agência TATOLI iha salaun João Paulo II, Comoro, segunda ne’e.

Foin lalais, Igreja Katólika liuhosi Arsebispu Metropolitana Arkidioseze Dili, Don Virgílio do Carmo da Silva, entrega ona dokumentu dokumentu ba Ministériu Ensinu Superiór, Siénsia no Kultura (MESSK) hodi analiza molok loke Universidade Katólika iha Dili.

Notísia relevante: Dioseze Dili entrega dokumentu ba MESSK molok loke universidade katólika

Nune’e, ANAAA simu ona kopia karta ida hosi Arsebispu Don Virgílio relasiona ho harii Universidade Katólika.

“Ministériu estabelese ekipa téknika ne’ebé daudaun halo hela analiza ba dokumentu universidade, nune’e tempu besik sei fó sai rezultadu ba públiku. Hanesan bainbain, instituisaun foun hotu ne’ebé mak hetan ona autorizasaun ba períodu tinan 3 to’o 5, ne’ebé  iha faze ne’e hanesan instalasaun. Bainhira ministériu fó ona autorizasaun maka konsidera hetan ona akreditasaun inisiál, ne’ebé tinan 5 konklui ona maka ANAAA foin halo akreditasaun institusionál dahuluk,” Edmundo esplika.

Tanba ne’e, ANAAA seidauk bele pronúnsia buat ruma ligadu ho akreditasaun ba universidade foun tanba sei hein rezultadu avaliasaun hosi MESSK.

Tuir Diretór ne’e, entidade sé de’it bele loke universidade maibé importante maka bele garante ninia kualidade hodi prodús rekursu umanu ne’ebé kualidade.

“Ministériu Ensinu Superiór, Siénsia no Kultura no ANAAA preokupa ho kualidade. Tanba ne’e, bele fó biban loke instituisaun foun, maibé hakarak mosu kedas ho kritériu kualidade no tenke kumpre,” nia subliña.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here