Komunidade Suku Uabubu no Caraubalu entrega rai ektare sia no mapa rai nian ba Governu liuhosi administradór munisipál atu halo konstrusaun ospitál munisipál. Imajen Tatoli/Vitorino Lopes da Costa.

VIQUEQUE, 07 dezembru 2021 (TATOLI)—Komunidade Wedarak, suku Uabubu, postu administrativu Ossu no suku Caraubalu, postu administrative Viqueque, tersa ne’e ofisialmente entrega rai ektare sia (9) ba ministériu saúde (MS) no adiministradór munisípiu Viqueque hodi konstrui ospitál munisipál Viqueque.

Notísia Relevante: Komunidade Buanurak entrega rai ba Governu estabelese Hospitál Referénsia

“Ohin, komunidade husi parte rua ne’e ofisialmenta entrega rai ba ministériu saúde no munisípiu hodi halo konstrusaun ospitál munisípiu Viqueque iha área Buanurak,” Reprezentante Ministru Saúde, Diretór Jeral Kooperativa, Marcelo Amaral hateten ba jornalista sira iha serimónia entrega rai iha Buanurak, Viqueque, tersa ne’e.

Marcelo hatutan, proposta har’i ospitál munisípiu ne’e inisíativa hosi autoridade, juventude no veteranu sira, nune’e komunidade bele asesu ospitál. Ho inisíativa ida-ne’e, MS sempre tau perioridade hodi establese ospitál ba iha munisípiu sira no importante mak rai ba harii ospitál ne’e iha.

“Kona-ba harii ospitál ne’e ministériu saúde fó prioridade, importante mak fatin maibé ita-nia komunidade hosi uma lisan rua iha inísiativa oferese rai ba Estadu atu konstrui ospitál iha Buanurak,” nia haktuir.

Nia agradese ba komunidade hosi parte Wedarak Uabubu no Wedarak Carauballu ne’ebé entrega ona rai ektare sia (9) atu konstrui ospitál munisípal, nune’e iha tinan 2022 MS hahú halo estudu ba konstrusaun ospitál refere.

Adiministradór munsípiu Viqueque, Januariu Soares “Bolly” hateten, ospitál munisipál sai hanesan nesesidade importante no urjente atu bele fasilita komunidade ho kondisaun ospitál ne’ebé adekuadu.

“Ospitál sai hanesan nesesidade importante ba ami-nia komunidade hodi asesu no hetan atendimentu ne’ebé di’ak. Tanbasá tenke kuriozu harii ospitál tanba komunidade asesu ospitál nasionál dook no referál Baucau mós dook. Tanba ne’e, ami buka meu hodi konvense ita-nia komunidade para oferese rai ba munisípiu hodi konstrui ospitál,” nia dehan.

Antes ne’e, komunidade Buanurak oferese uluk rai ektare lima maibé iha prosesu laran família balu la aseita. Ho ida-ne’e, ekipa munisípiu husu fali komunidade Wedarak iha área Buanurak no Caraubalu, sira oferese gratuita rao hodi konstrui ospitál.

Reprezentante Nain Ba Rai, Francisco Soares da Silva hateten, rai ektare sia (9) ne’e oferese gratuita ba autoridade munisípiu hodi halo konstrusaun ospitál.

“Ami komunidade hosi Wedarak rua ne’e prontu entrega rai hodi konstrui ospitál no apoiu ba prosesu dezenvolvimentu iha munisípiu Viqueque. Ami-nia rekomendasaun mak ami fó ona rai tenke konstrui duni ospitál,” nia dehan.

Vise Xefe Estadu Maiór Jenerál Falintil-Forsa Defesa Timor-Leste (F-FDTL), Majór Jenerál Falur Rate Laek, agradese ba komunidade parte Buanurak ne’ebé ho laran kmaan hodi oferese rai hodi konstrui ospitál, tanba ida-ne’e ezemplu di’ak no kontruibui ba prosesu dezenvolvimentu liu-liu iha munisípiu Viqueque.

“Ha’u hakarak husu agradese ba komunidade rua ne’ebé ho inisíativa di’ak hodi ofisialmente entrega ona rai. Ba oin halo konstrusaun, ha’u lakohi rona impedimentu ruma mosu tan iha ne’e,” nia hateten.

Entretantu partisipa iha serimónia entrega rai ne’e, hetan partisipa husi autoridade lokál, diretór liña ministerial sira iha munisípiu Viqueque no komunidade husi postu Ossu no Postu Viqueque Villa

Jornalista : Vitorino Lopes da Costa

Editór     : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here