Ministra Saúde (MS), Odete Maria Freitas Belo no Administradór Munisipiu Viqueque, Januario Soares ‘Bolly’, observa direta rai ektare lima (5) ba instalasaun futura hospital Referénsia iha Viqueque. Imajen Tatoli/Vitorino Lopes da Costa.

VIQUEQUE, 17 Jullu 2021 (TATOLI)—Ministra Saúde (MS), Odete Maria Freitas Belo ho administradór munisipiu Viqueque, Januario Soares ‘Bolly’, sábadu ne’e observa direta rai ektare lima ne’ebé komunidade Buanurak entrega ba Governu (Ministériu Saúde) sai hanesan instalasaun futura hodi estabelese hospital referénsia.

“Ha’u agradese tebes ba komunidade no autoridade sira iha partense ba rai ida-ne’e nian ne’ebé disponiblidade entrega rai ba Governu hodi establese hostpitál referénsia. Ne’e investimentu boot ba ita-nia rain, espesiál ba Viqueque. Rai ne’ebé mak atu entrega ba Governu ne’e, sei hein karta rai nian hosi parte rai-na’in.  Parte Governu sei haree ba plantasaun komunidade nian hodi fó kompensasaun,” Odete Maria Freitas Belo hateten ba jornalista sira, iha Buanurak, Viqueque, sábadu ne’e.

Govenante ne’e hateten, asaun komunidade nian ba Governu mak tenke halo hospital referénsia ne’ebé parte Governu liuhosi Ministériu Saúde komprimenta katak sei halo no sei tau prioridade ba planu 2022 nian tanba Governu sei hein dokumentu bainhira rai-na’in entrega iha fulan setembru.

“Iha setembru ha’u sei mai fali iha Viqueque hodi simu dokumentu rai nian hosi komunidade. Adiministreadór, Teras no Propriadade sira katak rai ne’e entrega ona ba Ministériu Saúde hodi estaka ba rai ne’ebé oferese hosi komunidade Buanurak,” nia dehan.

Iha fatin hanesan, Adiministradór Munisípiu Viqueque, Januario Soares ‘Bolly’ haktuir, sei prepara no tarata estatutu rai nian ne’ebé komunidade Buanuarak oferese ba Governu hodi establese hospitál referénsia ne’e.

“Ohin ministra haree direta ona rai no ami hela sei trata estatutu rai nian. Ami hela sei esforsu, iha fulan agustu agora, ami ho rai na’in sira sei tur hamutuk hodi haree dokumentu tanba ministra hateten iha fulan setembru tenke entrega dokumentu rai nian,” Januario dehan.

Entretantu reprezentante rai-na’in, Domingos Soares Sarmento, hateten povu Buanurak prontu entrega rai ba Governu hodi hari’i hospital referénsia iha fatin ne’e maibé Governu tenke realiza planu ne’e iha futuru.

“Ami prontu ona atu entrega rai ektare lima ba Governu, ne’e laiha problema maibé Governu tenke realiza planu ne’e. Se la halo ami povu Buanurak sente triste boot, tanba adiministradór munisípiu no ministra saúde mós mai haree ona. Ne’ebé, ami hakarak tenke iha rezultadu,” nia hateten.

Iha biban ne’e, Diretó Teras no Propriadade, Apolinario Ximenes hateten parte rai-na’in entrega ona rai ba Governu entaun Teras no Propriadade sei forma ekipa integradu ida para haree no sei halo levantamentu ba rai.

Enkuantu rai ne’ebé oferese ba ministériu saúde ne’e lokaliza iha aldeia Buanurak, suku Uabubo, postu adiministrativu Ossu, munisípiu Viqueque.

Jornalista : Vitorino Lopes da Costa

Editór      : Cancio Ximenes

HAKEREK NO HATÁN

Please enter your comment!
Please enter your name here