Ministru Koordenadór Asuntu Ekonómiku (MKAE), Joaquim Amaral. Imajen TATOLI/Francisco Sony.

DILI, 07 dezembru 2021 (TATOLI)—Empreza Pelican Paradise to’o agora seidauk hahú projetu iha área Tasi-Tolu tanba hein hela akordu investimentu espesiál hosi Governu hodi sai baze legál.

Ministru Koordenadór Asuntu Ekonómiku (MKAE), Joaquim Amarál, hateten daudaun ne’e Governu sei reajusta dokumentu legál balun ho Ministériu Justisa (MJ), hafoin ne’e mak koordena ho empreza Pelican Paradise hodi realiza asina akordu investimentu ne’e.

“Ami trata hela asuntu ne’e hein katak bele finaliza iha fulan-dezembru ne’e. Tanba Governu presiza reajustamentu, koordenasaun ho ministériu justisa ne’ebé presiza tempu atu finaliza. Dokumentu agora hein de’it semana ne’e nia laran halo negosiasaun, kontaktu ho sira (empreza), kuandu iha konkordansia ona bele asina ona akordu investimentu ne’e iha dezembru tinan ne’e,”  Ministru Koordenadór ne’e hateten ba Agência Tatoli, iha Parlamentu Nasionál, tersa ne’e.

Empreza Pelican Paradise to’o agora seidauk implementa projetu ne’e tanba seidauk iha akordu investimentu, maske iha tinan 2016 parte rua realiza ona diskusaun. Nune’e kleur demais afeta tebes empreza tanba defísil atu halo planu investimentu boot ida kuandu laiha timeline fiksu. Tanba ne’e mak empreza ninia esperansa katak molok ramata tinan ne’e bele realiza ona akordu refere.

Akordu investimentu espesiál ne’e atubele fasilita halo kontratu ho kompañia seluk hodi hamutuk halo investimentu faze dahuluk ba konstrusaun ótel, apartamentu no rezidénsia hamutuk unidade 287 ho estandarte fitun-lima, ho kustu obra hamutuk millaun $100.

Àrea dezenvolvimentu turíztiku sei harii iha rai ektare 558, iha zona entre Tasi-Tolu no Tibar, ne’ebé sei inklui unidade otelária, kampu golf, lote rezidensiál, sentru dezenvolvimentu ba joven sira, eskola internasionál ida, ospitál ida no sentru komersiál.

Dezenvolvimentu ne’e sei permite kriasaun kampu traballu ba ema 1.500 iha faze konstrusaun no 1.300 kampu traballu permanente hafoin konstrusaun no reflorestasaun projetu.

Enkuantu, durante empreza ne’e eziste, gasta ona osan besik millaun $8 ba operasionál, dezeñu, estudu viablidade, inklui konkursu públiku.

Notísia Relevante: Pelican Paradise preokupa seidauk iha akordu investimentu afeta ba planu

Jornalista : Antónia Gusmão

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here