Diretór Ezekutivu Pelican Paradise, Jeremiah Chan. Imajen TATOLI/Egas Cristovão

DILI, 25 novembru 2021 (TATOLI)–Empreza Pelican Paradise to’o agora seidauk hahú projetu iha área Tasi-tolu tanba hein hela akordu investimentu espesiál hosi Governu hodi sai baze legál.

“Ami seidauk halo buat ida iha Tasi-tolu tanba seidauk iha akordu investimentu, hosi uluk kedas to’o agora seidauk asina, prosesu ne’e la’o kleur tebes, maski iha tinan 2016 ami halo ona diskusaun. Kuandu kleur demais afeta tebes ba ami tanba difísil atu halo planu investimentu boot ida kuandu laiha timeline fiksu. Ami espera labele liu tinan ne’e, tanba tinan oin Governu okupadu ho eleisaun bele fó impaktu boot liután, di’ak liu asina ona akordu ne’e iha tinan ne’e, ami fiar katak Governu iha mekanizmu no kbiit atu rezolve problema,” Diretór Ezekutivu Pelican Paradise, Jeremiah Chan, hateten ba Agência TATOLI, iha ninia knaar fatin, Timor Plaza, kuarta ne’e.

Jerente ne’e dehan, empreza ne’e halo investimentu ho kapitál rasik, tanba ne’e sériu ho saida mak sei halo.

“Ami la mai atu halimar no realidade maka tinan ba tinan COVID-19 mós ami lasai hosi Timór, ami-nia odamatan la taka, ami kontinua selu ami-nia funsionáriu, la bosok Governu no povu Timor-Leste. Antes ne’e ami investe iha Malázia ema la fiar, maibé realidade akontese duni investimentu,” nia akresenta.

Iha sorin seluk, Ministériu Koordenadór Asuntu Ekonómiku (MKAE) kontinua halo avaliasaun ba proposta akordu investimentu espesiál Pelican Paradise hodi submete ba Konsellu Ministru  no hetan apresiasaun no aprovasaun atubele regula no fasilita dezenvolvimentu turíztiku ho kustu obra millaun $700.

Notísia relevante: MKAE avalia hela proposta akordu investimentu ho Pelican Paradise

Nune’e, responsável ne’e nafatin tau fiar ba Governu no otimista katak prosesu ne’e sei konklui tinan ne’e, tanba akordu espesiál investimentu  importante ba Governu no empreza Pelican Paradise tanba ko’alia kona-ba parte rua ninia responsabilidade.

Iha parte seluk Diretór ne’e preokupa foin lalais Governu liuhosi reuniaun Konsellu Ministru iha 29 setembru 2021 aprova ho alterasaun ida ba progresu asina akordu espesiál investimentu entre Governu ho Pelican Paradise, maibé empreza rasik seidauk hatene alterasaun iha parte saida no seidauk simu informasaun hosi Governu.

Empreza hahú loke konkursu públiku

Iha sorin seluk, empreza anunsia ona konkursu públiku iha faze dahuluk iha juñu 2020 tanba konkursu ne’e presiza tempu, ne’ebé iha empreza internasionál balun mak interese no submete ona proposta.

“Prosesu loke konkurdu desde tina kontuk, ne’ebé agora presu iha ona mudansa, entaun sei halo fali negosiasaun ho empreza sira,” Jeremiah Chan adianta.

Notísia relevante: Pelican Paradise loke ona konkursu públiku konstrui otél iha Tasi-tolu

Projetu ne’e boot, ne’ebé iha ona empreza internasionál lima mak partisipa, enkuantu prosesu konkursu públiku atinje ona 80%, maibé Pelican Paradise atu fó kontratu ba empreza sira labele tanba akordu investimentu espesiál seidauk asina ho Governu.

“Ami mós sei hein fali Governu nia timeline, hafoin ami bele finaliza ho kontratór ne’ebé sei hili no konklui prosesu, atu nune’e sira bele hahú serbisu. Maibé buat sira ne’e seidauk bele realiza kuandu ami seidauk hatene klaru timeline hosi Governu, ne’ebé kestaun ne’e sei determina bainhira iha ona akordu investimentu espesiál,” Jerete ne’e dehan.

Governu responsável halo libertasaun rai iha área projetu

Tuir proposta investimentu, Governu Timor-Leste mak sei responsável halo negosiasaun ho komunidade hodi halo libertasaun rai iha área projetu hodi empreza hahú obra.

“Seidauk iha akordu atu kesi metin investimentu boot, tanba ne’e seidauk bele la’o tanba laiha fiar hosi Governu hodi asegura rai no seluk tan,” Diretór Ezekutivu Pelican Paradise esklarese.

Akordu investimentu espesiál ne’e atubele fasilita halo kontratu ho kompañia seluk hodi hamutuk halo investimentu faze dahuluk ba konstrusaun otél, apartamentu no rezidénsia hamutuk unidade 287 ho estandarte fitun-lima, ho kustu obra hamutuk millaun $100.

Àrea dezenvolvimentu turíztiku sei harii iha rai ektare 558, iha zona entre Tasi-tolu no Tibar, ne’ebé sei inklui unidade otelária, kampu golf, lote rezidensiál, sentru dezenvolvimentu ba joven sira, eskola internasionál ida, ospitál ida no sentru komersiál.

Dezenvolvimentu ne’e sei permite kriasaun kampu traballu ba ema 1.500 iha faze konstrusaun no 1.300 kampu traballu permanente hafoin konstrusaun no reflorestasaun projetu.

Empreza iha ona lisensa ambientál

Antes projetu ne’e hahú tenke halo estudu ambientál, ne’ebé ba kestaun ne’e Governu realiza ona no atribui ona lisensa ambientál ba empreza.

“Karik iha impaktu negativu halo mitigasaun projetu sira hanesan ne’e mak Pelican Paradise la hadi’a ambiente iha Tasi-tolu, maka ami garante turista lamai. Tanba ne’e, ami tenke hadi’a liután ambienta agora iha Tasi-tolu para atrai turista”, nia subliña.

Notísia relevante: Pelican Paradise renova ona lisensa ambientál

Durante empreza ne’e eziste, gasta ona osan besik millaun $8 ba operasionál, dezeñu, estudu viablidade, inklui konkursu públiku.

Sorin seluk, Ministru Prezidénsia Konsellu Ministru no Portavóz Governu, Fidelis Manuel Leite Magalhães, hateten, tempu badak MKAE ho empreza Pelican Paradise sei tuur filafali hodi konklui dokumentu balun hodi avansa ba asina akordu investimentu

“Foin lalais Governu halo ona desizaun ida kona-ba akordu investimentu ne’e, entaun iha ona alterasaun, iha alterasaun ne’e presiza parte rua tuur hamutuk filafali no konkorda kona-ba kontiúdu akordu ne’e. Semana ne’e, Governu liuhosi MKAE sei tuur hamutuk ho investidór hodi halo negosiasaun finál ida kona-ba testu no substánsia iha akordu ne’e rasik,” governante ne’e informa.

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here