Plenária Parlamentu Nasionál. Imajen Tatoli/António Gonçalves.

DILI, 06 dezembru 2021 (TATOLI)—Deputadu sira iha Parlamentu Nasionál, iha segunda ne’e, aprova proposta Orsamentu Jerál Estadu (OJE) 2022 ba Sekretária Estadu Igualdade no Inkluzaun (SEII) ho montante $2,027,440 iha diskusaun espesialidade ho rezultadu votasaun a-favór 40, kontra ida (1) no absentensaun sia (9).

Notísia Relevante: OJE 2022 ba Prezidente Repúblika aprova iha espesialidade

“Nune’e porposta orsamentu ba SEII pasa,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária.

Iha OJE 2022 ne’e prevee $2,027,440 ne’ebé aloka ba saláriu vensimentu $550,991, bens servisu $1,140,059, kapitál menór $36,390, kapitál dezenvolvimentu laiha no transferénsia públika hamutuk $300,000.

Hosi Orsamentu Jerál Estadu 2022 ne’e sei finansia ba programa rua (2), sub-programa ualu (8) no atividade 13.

Iha debate espesialidade ne’e, antes aprova aprova proposta Orsamentu Jerál Estadu (OJE) 2022 ba Sekretária Estadu Igualdade no Inkluzaun (SEII), iha proposta ida ho númeru 15 hosi proponente Deputada CNRT, Veneranda Lemos, maibé meza la admite.

Veneranda Lemos hateten razaun fundamental atu halo proposta atu hasai osan hosi transferénsia públika tanba iha audiénsia nota katak orsamentu ne’ebé aloka ba kategoria ne’e boot maibé realidade osan ne’e la aloka tuir programa nune’e halo proposta atu redús osan.

“Razaun seluk mós tanba iha dalan klaran SEII halo fila-fali transferénsia ba organizasaun naun governamentál sira-ne’ebé la hola parte iha asuntu SEII nian. Maibé meza la admite ami-nia proposta lahatene razaun saida, nune’e halo rekursu,’” Deputada Veneranda Lemos hateten iha plenária Parlamentu Nasionál, iha debate proposta lei OJE 2022 iha espesialidade loron dahuluk, segunda ne’e.

Prezidente Parlamentu Nasionál, Aniceto Longuinhos Guterres Lopes, justifika meza la admite ho razaun fundamentál tanba entre proponente uza linguazen ba Governu inkonstituisionál.

Ho rekursu ne’e liuhosi votasaun plenária ba proposta númeru 15 ho rezultadu votasaun a-favór-19 kontra 39 no abstensaun lima, nune’e proposta ne’e la pasa.

Tuir livru 2 planu anuál OJE 2022 SEII iha programa boa-governasaun no jestaun instituisionál sei gasta $776,649 no programa igualidade jéneru no inkluzasaun sosiál sei gasta $1,250,791.

Programa boa-governasaun no jestaun instituisionál ho nia sub-programa tolu (3) no atividade tolu (3).

Programa igualidade jéneru no inkluzasaun sosiál ho nia sub-programa integrasaun kompromisu jéneru no inkluzaun sosiál iha programa, lei no orsamentu estadu no komunidade jerál, ho nia atividade mak promove konsesializasaun kona-ba igualidade jéneru no inkluzaun sosiál, atividade estratéjia advokásia kona-ba igulaidade jéneru no inkluzasaun sosiál, atividade asisténsia instituisaun no ajénsia estadu, atividade apoiu pontu fokál SEII iha munisípiu 12 no RAEOA.

Sub-programa empoderamentu ekonómiku ba feto no komponente sira seluk ne’ebé ho kondisaun vulnerável liu ho nia atividade mak apoiu asisténsia ba grupu feto, defisiénsia, komunidade LGBTI iha dezenvolvimentu ba abilidade ekonómika.

Sub-programa planeamentu, monitorizasaun no avaliasaun ho nia atividade monitorizasaun no avaliasaun implementasaun ba kompromisu jéneru no inkluzasaun sosiál, atividade peskiza kona-ba igualidade jéneru no inkluzaun sosiál.

Sub-programa hapara violénsia kontra feto, labarik no komponente vulnerável liu nia atividade advokásia asegura asesu vítima violénsia bazea ba jéneru ba iha justisa formal, atividade konsensializasaun kona-ba prevensaun violénsia bazea ba jéneru.

Sub-programa partisipasaun feto iha polítika no nivél foti desizaun nia atividade mak kapasita feto, defisiénsia, membru komunidade LGBTI ba dezempeña funsaun ho natureza polítika nivél lokál no nasionál.

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here