Imajen/Media PR.

DILI, 06 dezembru 2021 (TATOLI)—Reprezentante povu iha uma fukun Parlamentu Nasionál aprova proposta Orsamentu Jerál Estadu (OJE) 2022 ba Prezidente Repúblika iha espesialidade.

Proposta OJE 2022 hosi PR nian laiha proposta ruma hosi reprezentante povu sira, no proposta refere aprova ho rezultadu votasaun a-favór 42, kontra ida (1) no abstensaun 21.

“Nune’e proposta orsamentu 2022 ba Prezidénsia Repúblika aprovadu iha espesialidade,” Prezidente Parlamentu Nasionál, Aniceto Longuinhos Guterres Lopes, anunsia liuhosi plenária Parlamentu Nasionál iha debate proposta OJE 2022 iha faze espesialidade ba loron dahuluk, segunda ne’e.

Prezidénsia Repúblika propoin iha Orsamentu Jerál Estadu (OJE) 2022 hamutuk $10,088,413.

Prezidensia Repúblika prevee orsamentu $10,088,413 aloka ba saláriu vensimentu $1,295,828, bens servisu $3,991,297, kapitál menor $774,500, kapitál dezenvolvimentu $250,000 no transferénsia públika $350,001, atu finansia programa lima, sub-programa 11 no atividade 25.

Programa lima ne’e mak hanesan identidade nasionál sei gasta $648,242, Estadu direitu demokrátiku sei gasta $254,080, relasaun internasionál no diplomátika sei gasta $1,100,552, dezenvolvimentu sustentável sei gasta $1,423,913 ho boa-governasaun no jestaun instituisionál sei gasta $6,661,626.

Prezidensia Repúblika aprezenta estimativa ho forsa traballu funsionáriu hamutuk 256 permanente (feto 72 no mane 184), ho funsionáriu 25 ho kargu dirasaun no xefia, hosi efetivu ne’e la inklui funsionáriu nomeasaun polítika.

Papél Prezidente Repúblika hanesan Xefe Estadu, simbolu no garante indepedénsia nasionál, unidade estadu no regular funsionamentu instituisaun demokrátika. Prezidente Repúblika hanesan Komandante Supremu Forsa Armada (konstituisaun repúblika artigu 74).

Jornalista : Nelson de Sousa

Editór       : Cancio Ximenes   

PUBLISIDADEiklan

HAKEREK NO HATÁN

Please enter your comment!
Please enter your name here