Imajen/Mídia PR.

DILI, 06 dezembru 2021 (TATOLI)—Parlamentu Nasionál aprova iha proposta Orsamentu Jerál Estadu (OJE) 2022 ho montante $50.000 iha faze espesialidade hodi akompaña prosesu auto-determinasaun ba povu Sahara Osidentál.

Notísia Relevante: TL Kontinua Solidária Povu Sahara Osidentál

“Kompromisiu Estadu Timor-Leste nian atu apoiu kauza direitu auto-determinasaun povu Sahara Osidentál,” Deputadu proponente, Abel Pires, hateten iha plenaria PN iha debate proposta lei Orsamentu Jerál Estadu 2022 iha espesialidade iha loron dahuluk, segunda ne’e.

Parlamentu kria ona rezolusaun ba kriasaun komisaun ida ho deputadu na’in-sia atu akompaña halo servisu, tanba ne’e orsamentu privativu aprova antes entaun iha duni nesesidade atu responde hodi promove kauza refere iha rai-laran no rejional, internasionál.

Proposta ne’e aprovadu iha plenária afavór-39 kontra 0 no abstensaun 19, nune’e proposta refere pasa.

Iha debate espesialidade loron dahuluk iha segunda ne’e, Parlamentu Nasionál aprova proposta númeru 13 ne’ebé prevee orsamentu $50.000 ba uma fukun hodi akompaña prosesu auto-determinasaun ne’ebé povu Sahara Osidentál luta hela.

Programa ho kódigu 031 kona-ba fomenta relasaun internasionál no kooperasaun Parlamentu ho montante $1,235.259 aumenta tán $50.000, nune’e programa refere sa’e ba $1,285.259.

Montante orsamentu $50.000 ne’e foti hosi bens no servisu hosi Parlamentu Nasional $6,620.406 nune’e kategoria ida-ne’e hela $6,570.406.

Justifikasaun sumária ne’ebé aprezenta hosi proponente sira katak, kompromisu Estadu Timor-Leste ba povu Saraui atu alkansa solusaun polítika ne’ebé justa, mutuál no aseitavel bazea ba kompromisu internasinál hodi permite realizasaun referendu ba auto-determinasaun iha Sahara Osidentál, iha kontextu dispozisaun koerente ho prinsípiu no objetivu karta Nasaun Unida.

Nune’e nessesária PN aloka ho verba $50.000 ba atividade komisaun apoia ba Sahara Osidentál.

Notísia Relevante: Prezidente Repúblika Apoia Direitu Auto-Determinasaun Povu Sahara Osidentál

Proposta númeru 13 ne’e aprezenta hosi Deputadu Abel Pires da Silva, José Agostinho Siqueira ‘Somotxo’, Isabel Maria Freitas Ximenes, Elvina Sousa Carvalho no Olinda Guterres.

Iha debate deputadu proponente Abel Pires da Silva, David Dias Ximenes ‘Mandati’, Isabel Ximenes, António de Sa Benevides, Olinda Guterres aprezenta mós proposta númeru 14 ho montante $10,000 realizasaun premiu Max Sthal.

Programa ho kódiku 160 kona-ba promove kultura aberta no transparansia iha PN ho montante $235.575 aumenta tan $10.000 nune’e programa refere sa’e ba $245.575.

Montante orsamentu $10.000 ne’e foti hosi bens no servisu hosi Parlamentu Nasional $6.580.406 nune’e kategória ida ne’e hela $6.570.406.

Justifikasaun sumária, PN aprova ona rezolusaun númeru 25/2021, 01 dezembru kona-ba insititui prémiu liberdade Max Stahl, nune’e PN presiza aloka orsamentu ba tinan 2022 tanba konsidera nu’udar atividade foun. Orsamentu atu finansia atividade refere ho montante $10.000.

Deputadu Abel Pires, hateten proposta ne’e presiza tanba semana kotuk aprova institui prémiu Max Sthal tau osan hodi realiza.

Nune’e proposta númeru 14, rezultadu afavór-39 kontra 0 no abstensaun 19, ho ida ne’e pasa.

Iha mós proposta numeru 30 hosi proponente Maria Angélica Rangel da Cruz, Francisco de Vasconselho prevee montante $250.000 ba kriasaun komisaun eventual iha servisu justisa.

Programa ho kódiku kona-ba boa-governasuan no jestaun instituisionál iha PN ho montante $2,245.912 aumenta $250.000 nune’e programa ne’e sa’e ba $3,541.192.

Montante orsamentu $250.000 ne’e hosi Parlamentu Nasionál transefere fila-fali ba transferénsia públika.

Justifikasaun sumária, artigu 83 lei Organizasaun Judisiáriu estabelese kriasaun komisaun rekrutamentu selesaun juiz Supremu Tribunál Justisa, no artigu 12 refere despeza funsionamentu komisaun finansia OJE, hosi despeza dotasaun Parlamentu Nasionál.

Deputadu Francisco de Vasconcelos hateten, iha lei foun Organizasaun Judisiáriu ba harii Tribunál Supremu Justisa no iha artigu ida ko’alia kona-ba rekrutamentu asesu juiz sira ba ultima instánsia presiza liu hosi komisaun ida bolu komisaun selesaun.

No komisaun ne’e kompostu hosi Parlamentu Nasionál no mós reprezentante Prezidénsia Repúblika halo selesaun ba prosesu hafoin konsellu superiór majistratura judisiál mak sei proklama haree rezultadu ikus.

Tanba ne’e mak PN presiza orsamentu $250.000 hodi harii komisaun eventual refere, no proposta númeru 30, rezultadu a-favór- 41, kontra 0 no abstensaun 17.

Ministru Finansa, Rui Gomes, hateten proposta sira-ne’e atu fiannsia atividade desizaun PN atu koloka fila-fali parte Governu laiha objesaun.

Aleinde ne’e plenária aprova proposta OJE 2022 ne’ebé destina ba Parlamentu Nasionál ho montante $14.604.224, ho rezultadu votasaun a-favór-41, kontra 0 no abstensaun 17.

“Nune’e Orsamentu ba Parlamentu Nasionál ba 2022 aprovadu iha espesialiade. No ho mós proposta aprovasaun proposta 13,14.30 sei sofre alterasaun orsida sei iha redasaun finál,”  Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária.

Parlamentu Nasionál nu’udar orgaun soberania Repúblika Demokrátika Timor-Leste, reprezentativu sidadaun timorense hotu ho podér lejislativu, fiskalizasaun no desizaun polítika. (Constituição da República, Artigo 92º).

Parlamentu Nasionál iha OJE 2022 prevee $14,604.224 hodi aloka ba saláriu vensimentu $5,600.959, bens servisu $6,570.406, transferénsia públika $1,552.000, kapitál menór $630.859, kapitál dezenvolvimentu $250.000, no hosi orsamentu ne’e atu finansia programa lima (5), sub-programa sia (9) no atividade 32.

Proprama fomenta relasaun internsionál no kooperasaun Parlamentu sei gasta $1,235.259, programa garante ezesisíu funsaun konstituisionál Parlamentu sei gasta $7,853.290, programa promove kultura abertura no tranferénsia iha Parlamentu sei gasta $331.575, programa boa-governasaun no jestaun instituisionál sei gasta $5,133.998 no programa igualidade jéneru no inkluzaun sosiál sei gasta $50.102.

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here