Prezidente Repúblika, Francisco Guterres Lú Olo. Imajen Tatoli/António Gonçalves

DILI, 30 agostu 2019 (TATOLI)—Prezidente Repúblika, Francisco Guterres Lú Olo, kontinua solidária ba povu Sahara Osidentál ne’ebé ohin loron luta ba sira-nia autodeterminasaun.

“Iha loron haksolok ne’e, ita labele haluha povu ida ne’ebé sei luta hela atu ukun-aan, Sahara Osidental, iha Áfrika.  Sira sei moris iha terus laran. Sira luta tinan rua nulu resin ualu ona. Orgnizasaun Nasaun Unidade (ONU) rekoñese sira-nia direitu atu hili rasik sira-nia futuru maibé to’o ohin loron, povu Sahara Osidentál  seidauk hetan sira-nia direitu,” Lú Olo hato’o sentimentu solidariedade ne’e liuhusi ninia deskursu iha Komemorasaun Tinan 20 Konsulta Populár ne’ebé hala’o iha Tasi Tolu, Dili, ohin.

Nia dehan, Timor-Leste sei fó-liman nafatin ba Sahara Osidental, tanba povu Timor-Leste, povu ida ne’ebé solidáriu, la ta’uk luta ba direitu ema nian iha ne’ebé de’ it! Brani luta ba hatuur justisa no pás iha rai laran no iha rai sira seluk.

Mudansa Klimátika

Iha oportunidade ne’e, Xefe Estadu informa katak Timor-Leste nu’udar membru ida hosi komunidade internasionál, preokupa ho dezafiu barak ne’ebé mundu tomak hasoru dadaun.

Lú Olo haktuir, alterasaun klimátika sai realidade ida ne’ebé ema hotu labele sees. Kestaun ida ne’e mak ohin loron, kondisiona ajenda polítika internasionál.

“Ita-nia rai lokaliza iha rejiaun ida ne’ebé iha nasaun barak hosi pasífiku, illa barak, ne’ebé dadaun ne’e ameasa atu lakon. Karik ita la kuidadu agora kedas, iha risku boot ida katak nasaun ki’ik sira ne’e hetan kondisaun hodi lakon, ka mout iha tasi okos. Atu enfrenta dezafiu ida ne´e, ita-nia hakarak mak komunidade internasionál hametin kooperasaun efikáz ho komunidade sira ne´ebé vulnerável,” Lú Olo tenik.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here