Plenaria Parlamentu Nasional. Imajen Tatoli Antonio Goncalves.

DILI, 06 dezembru 2021 (TATOLI)—Tuir kalendáriu, segunda ne’e (06/12) Parlamentu Nasionál ho Governu hahú hala’o debate proposta lei Orsamentu Jerál Estadu (OJE) 2022 ba  iha faze espesialidade.

Notisia Relevante: PN aprova proposta OJE 2022 iha jeneralidade

Tuir ajenda ne’ebé iha sei hahú diskusaun lei orsamentál ne’e iha tuku 9:00 ne’e, no debate espesialidade refere sei termina iha 17 dezembru.

Antes ne’e PN halo ona diskusaun proposta lei OJE 2022 termina ona faze jeneralidade iha loron 03 dezembru ne’e.

Tuir Rejimentu Parlamentu Nasionál (RPN) artigu 167.º (Diskusaun no votasaun iha espesialidade), alinea 1, hateten debate iha espesialidade kona-ba proposta lei planu no Orsamentu Jerál Estadu nian labele liu loron 10, no organiza ho maneira atu bele diskute, tutuir malu, orsamentu hosi ministériu ida-idak no menbru Governu ida-idak intervén iha ne’e.

Iha alínea 2 haktuir, debate iha espesialidade ba proposta lei planu no Orsamentu Jerál Estadu nian halo iha plenáriu.

Nune’e mós iha RPN artigu 168.º (Votasaun finál global) aprova tiha iha espesialidade, proposta lei sira submete ba votasaun finál globál.

OJE 2022 prevee biliaun $1,675, hosi montante ne’e millaun $233 ba saláriu no vensimentu, millaun $449,98 ba bens servisu, millaun $565,9 ba transferénsia públika, millaun $24,4 koresponde ba kapitál menór no millaun $401,7 ba kapitál dezenvolvimentu.

Iha planu anuál Governu nian 2022 reflete kontinuasaun servisu reforsa jestaun finansa públika, ne’ebé susesivu Governu nian liuhosi roteiru orsamentasaun kada programa.

Bazea ba livru 2 planu annual OJE 2022 integra programa hamutuk 45, sub-programa 477 no totál atividade 2,445.

OJE 2022 fahe iha kategoria sira ba investimentu esensiál neen, millaun $226,5 ka 13,5% ba Dezenvolvimentu Kapitál Umanu (Edukasaun, Formasaun no Saúde), millaun $387,3 ka 23,1% ba programa Abitasaun no Inkluzaun Sosiál.

Millaun $345,9 ka 20,7% ba iha setór produtivu sira (Agrikultura no Turizmu), Ambiente no Konetividade, dezenvolvimentu setór privadu hetan alokasaun millaun $78,6 ka 4,7%, no dezenvolvimentu rurál no kooperativa, millaun $72,2 ka 4,3% no governasaun di’ak, millaun $116,3 reprezenta 6,9% husi OJE 2022.

Kuadru planeamentu kona-ba orsamentasaun kada programa bazea ba Planu Estratéjiku Dezenvolvimentu (PED) 2011-2030 no Objetivu Dezenvolvimentu Sustentável (ODS) 2030, hanesan dokumentu estratéjiku no dokumentu polítiku.

Jornalista : Nelson de Sousa

Editór       : Cancio Ximenes   

PUBLISIDADEiklan

HAKEREK NO HATÁN

Please enter your comment!
Please enter your name here