Imajen/Media PR.

DILI, 03 dezembru 2021 (TATOLI)—Parlamentu Nasionál, sesta ne’e aprova proposta-lei  Orsamentu Jerál Estadu (OJE) 2022 iha faze jeneralidade.

Parlamentu Nasionál halo debate no aprova ba proposta lei númeru 35/V(4a) kona-ba Orsamentu Jerál Estadu 2022, ho rezultadu votasaun a-favór 44, kontra 0 no abstensaun 21.

“Ho nune’e proposta lei OJE 2022 aprovadu iha faze jeneralidade, faze tuir mai tuir prosedimentu diskusaun iha espesialidade hahú iha loron 06 dezembru,” Prezidente Parlamentu Nasionál, Deputadu Aniceto Longuinhos Guterres Lopes, anunsiu liuhosi plenária Parlamentu Nasionál.

Proposta OJE 2022 hamutuk biliaun $1,675, kompostu hosi millaun $233 ba saláriu no vensimentu, millaun $449,98 bens servisu, millaun $565,9 transferénsia públika, millaun $24,4 koresponde ba kapitál menór no millaun $401,7 ba kapitál dezenvolvimentu.

Iha propsota OJE 2022 prevee orsamentu ba prioridade neen ho orsamentu biliaun $1,226,736,280 (73,2%), kapitál dezenvolvimentu (edukasaun, formasaun profisionál no saúde) millaun $226,513,224 (13,5%), abitasaun no inkluzaun sosiál millaun $387,295,315 (23,1%), millaun $345,931,170 (20,7%), ba setór produtivu sira (agrikultura no turizmu), ambiente no konetividade, millaun $78,563,312 (4,7%), ba dezenvolvimentu setór privadu millaun $72,156,425 (4.3%), dezenvolvimentu rurál no kooperativa millaun $116,276,834 (6.93%).

Enkuantu, ba prioridade seluk iha OJE 2022 prevee orsamentu millaun $448,263,720 ne’ebé ekivalente 26,8%.

OJE 2022 sei finansia programa hamutuk 45 hosi prioridade nasionál neen ho objetivu atu atinje dezenvolvimentu ida-ne’ebé kualidade ho kresimentu ekonómiku ne’ebé inkluzivu no sustentavel.

Bankada FRETILIN, Deputadu Antonio Bianco konsidera oitavu Governu Konstitusionál nia servisu labele nega tanba situasaun defisíl laiha Governu ida mak hanesan ne’e, no Fretilin mai atu viabiliza hametin Estadu tuir prinsípiu no la’ós foin halo uluk kedas halo hamutuk ho CNRT tanba Estadu.

“Hanesan apresia OJE 2020, 2021ba programa cesta bázika ba to’o fatin-fatin no orsamentu ba uma kbi’it laek ho sira seluk.  Tan ne’e, OJE 2022 signifika ema barak sei partisipa liután hanoin programa kontinua agora bele aumenta reforsa setór oioin,” nia hateten.

Bankada CNRT, Deputada Virgina Ana Belo hateten hafoin lee tiha proposta OJE 2022 ho kuidadu relatóriu ezekusaun orsamentu, jestaun orsamentu, sistema konsidera mukit tebes.

“Ezekusaun orsamentu konsidera kapasidade mukit tebes komparasaun tinan 2020 atinje 75% no 2021 to’o ohin ezekusaun foin atinje 58%. Haree ba ida-ne’e kapasidade ezekusaun loloos proposta OJE 2022 tenke tun tan. Ba iha jestaun orsamentu ladún di’ak tanba 2020 mosu resensaun ekonomia, nune’e duvída ba kapasidade Governu, jestaun finansa públika tinan oin previzaun reseita doméstika tun,” nia dehan.

Prezidente Bankada PD, António da Conceição ‘Kalohan’, hateten iha loron 28 novembru komemorasaun proklamasaun liu-ba hodi halo reflesaun ba asswa’in sira ba ukun rasik an no atu moris di’ak povu nian, nune’e devate OJE 2022 mai atu hafunu ita hotu.

“OJE 2022 hanesan instrumentu hala’o dezenvolvimentu realiza objetivu estadu tuir artigu 6 konstituisaun. Nune’e, populasaun ho esperasaun boot sei ajuda povu sai forte tanba tinan barak ona situasaun polítika halo dezenvolvimentu la estavel ho tan situasaun COVID-19. Ho OJE  2022, Governu aprezenta programa prioridade neen,” Kalohan hateten.

Ho ida-ne’e, espera hadi’a moris povu nia tanba ukun rasik an povu presiza moris dignu no labele iha tan dezigualidade.

“Tinan 2022 nu’udar tinan polítiku no orsamentu orsamentu mai ho kada programa ba estratéjia hodi hasa’e krítiku deputadu sira-nian. Bankada PD hatudu nia analiza krítiku maibé orsamentu ne’e revitalizasaun ekonómia nasaun, nune’e Governu ida-ne’e la’ós dun ida halo projetu sira laiha estudu viabilidade. Nune’e, husu atu labele dun malu hadi’a irrigasaun sira nune’e povu agrikultór aumenta produsaun,” nia dehan.

Reprezentante Bankada PLP, Deputadu Noé da Silva, hateten Timor-Leste nia riku-soin mak mina rai ne’ebé to’o agora hasai ona biliaun $18 hodi alkansa finansia projetu estratéjiku maibé povu kontinua moris sei iha susar, nune’e presiza haree fila-fali revizaun planu estratéjiku dezenvolvimentu nasionál.

“Proposta OJE 2022 sai sentru hadi’a kontinuidade povu nia moris,” nia dehan.

Xefe Bankda KHUNTO, Deputada Olinda dos Santos, ohin marka tan pasu importante iha uma fukun ba debate proposta OJE 2022.

“Bankada KHUNTO observa liu tinan 19 maibé TL nafatin depedensia fundu mina-rai no laiha ekilibriu despeza no reseita, tanba ne’e jestaun instituisaun hodi orienta ba melloramentu povu bele sente, bele presta servisu ho di’ak. Periódu tinan rua povu hasoru COVID-19 halo ekonómia sofre, nune’e Governu halo meiu hotu oinsá atu introdús polítika ba dalan rekuperasaun ekonómia. Nune’e mós taxa partisipasaun vasina territóriu aumenta tan pre kondisaun Estadu atu normaliza sosiu ekonómiku, nune’e OJE 2022 determinante atu intervensaun adekuadu liu hosi programa sustentavel,” nia hateten.

Haree dinámiku ne’ebé la’o husu Governu prevee ba tetu OJE 2022 deside ona ho montante biliaun $1 no bankada KHUNTO afirma aprova proposta OJE 2022, atu Governu foka ba konsentra progama aumenta programa uma ba kbiit laek, Cesta Bazika, jestaun lixu priodridade ba dezenvolvimentu nasaun.

Xefe Bankada PUDD, Deputadu António de Sá Benevides, fó observasaun ba implementasaun programa 2021 ne’ebé Governu halo di’ak duni, hanesan kona-ba COVID-19 no vasinasaun ne’ebé apresia tebes servisu Ministéiru Saúde (MS) no CIGC ho kapasidade tomak hodi atua redús kazu no hasa’e númeru vasina.

“PUDD ezije MS servisu besik liu HNGV ho fasilidade no ekipamentu presiza moderniza. No husu mós rezolve lalais sira vitíma inundasaun ne’ebé hela iha lona okos no muda ona ba alozamentu temporáriu,” nia rekomenda.

PUDD apresia mós Ministéiru Petróliu no Minerál (ANPM) ba servisu hamutuk ho kompañia realiza ba perfurasaun mina iha Covalima no pasu ida no husu nafatin envolve másimu komunidade ba servisu simples hanesan Covalima-oan mós bele halo iha prosesu ne’e.

“Bankada PUDD laiha objesaun ba proposta OJE 2022 iha jeneralidade tanba prenxe rekezitu konsituisionál maibé povu husu orsamentu labele sai fatin no rohan hanesan de’it naroman, maibé isin-lolon laiha dalabarak povu dehan orsamentu bem estar povu nian,” nia hateten.

Xefe Bankada Frente-Mudança, Isabel Freitas Ximenes, hato’o apresiasaun boot ba Primeiru-Ministru hodi aprezenta proposta OJE 2022 iha inisíu diskursu aprezentasaun.

No apresia mós Ministru Finansa ho ekipa lori elaborasaun proposta OJE 2022 ne’ebé mai ho vizaun oinsá hadi’a finanseira no kontaviliza ho esforsu hotu mezmu iha difikuldade rekursu sira  ho  sistema utiliza programa baze orsamentu.

Xefe Bankada UDT, Deputadu Francisco David Xavier Carlos, hateten tempu atu bolu hamutuk parte hotu tanba ho situasaun COVID-19, inundasaun atu rezolve situasaun ne’e.

Nune’e, durante diskusaun jenereralidade povu ho esperansa orsamentu hadi’a moris sidadaun durante ne’e infrenta liu-ba. No programa Governu nian hanesan kontinuidade ba servisu anteriór kompromisu ba povu hanesan pontu importante kombate pandemia COVID-19, proteje sidadaun, rekupera ekonomia no empregu atu konkretiza ida-ne’e.

“UDT propoin haree rekursu jestaun rekupera ekonomia hadi’a povu nia moris no nu’udar partidu boot no istóriku prontu kontribui ba ukun Governu nian ne’ebé de’it no prontu bainhira tempu sira bainhira kaer ukun,” nia dehan.

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here