Produtu lokál iha Merkadu Taibesi. Imajen TATOLI/António Gonçalves

DILI, 06 dezembru 2021 (TATOLI)-Movimentu Scaling Up Nutrition  (SUN) iha segunda ne’e, realiza kompetisaun tein ai-han nutritivu lokál, ne’ebé partisipa hosi grupu hosi munisípiu Aileu, Lautém, no Dili.

Reprezentante Primeiru-Ministru ba Pontu Fokál Movimentu SUN, Filipe da Costa, hateten, kompetisaun ne’e ba pre-selesaun Prémiu Nutrisaun Nasionál Primeiru-Ministru, nune’e bele kontribui hamenus ba inseguransa ai-han no má nutrisaun ho númeru boot iha Timor-Leste.

“Atu kontribui redús numeru inseguransa ai-han no má nutrisaun, Primeiru-Ministru lansa ona Prémiu Nutrisaun Nasionál iha loron 10 agostu 2021 ho kategóriku prémiu ba suku, grupu feto, grupu to’os-na’in, grupu juventude no grupu suporta inan hodi buka solusaun ba problema nutrisaun no inseguransa ai-han iha Timor-Leste,” Pontu Fokál Movimentu SUN dehan iha Food Studio LELI, Kampung Alor.

Notísia relevante: Prémiu nasionál nutrisaun hodi rekoñese inovasaun timor-oan hadi’a má nutrisaun

Nune’e, kompetisaun atu promove talentu kreatividade grupu joven ne’ebé transforma fali ai-han tradisionál ne’ebé ema ladún konsumu ona sai ai-han nutritivu.

Antes ne’e, Primeinu-Ministru, Taur Matan Ruak, lansa ona Planu Asaun Konsolida Nasionál Seguransa Ai-han no Nutrisaun (CNAP-NFS, sigla inglés) iha reuniaun anuál Timor-Leste Development Partners Meeting (TLDPM) loron 30 jullu 2021.

CNAP NFS mai ho vizaun boot ba Timor-Leste liuhosi enkuadramentu rezultadu komún hodi hakotu hamlaha, alkansa seguransa ai-han no mellora nutrisaun, no promove agrikultura sustentável liuhosi asesu universál ba ai-han seguru, no hakotu forma oioin kona-ba má nutrisaun.

“Polítika governamentál CNAP-NFS nu’udar indikadór no alvu katak to’o tinan 2030, Timor-Leste sei atinje zero ba inseguransa ai-han no má nutrisaun tanba ohin loron ita rejista inseguransa ai-han menús nutrisaun 24,9% no faze klasifikasaun integradu seguransa ai-han 38%, redús raes-badak hosi 47,1% ba 25,19%, redús isin-krekas hosi 8,6% ba 3%, todan liu mantein 15%,” nia akresenta.

Prémiu Primeiru-Ministru ho objetivu atu rekoñese, valoriza no inspira timor-oan ne’ebé halo esforsu hadi’a inseguransa ai-han no nutrisaun.

“Ha’u kontente loos Gabinete Primeiru-Ministru no Scaling Up Nutrition Movement Secretariat bele promove atividade kompetisaun ida-ne’e,” nia tenik.

Iha atividade ne’e, kada grupu ida aprezenta produtu ai-han nutritivu, hanesan grupu kreatividade Haburas Talentu Juventude (HATAJO) hosi munisípiu Aileu, tein produtu lokál uza ai-farina sai boliñus, dosi lulun (dadar) tau nuu, fehun laranja sai jus no tein fore-keli transforma sai jus.

Grupu kriatividade Nuu-Laran hosi Lautém, produtu tratdionál ne’ebé sira uza mak lakeru tasak, halo dosi bollu, bolliñus no tein fehuk roux sai pudding.

Enkuantu, grupu joven kreatividade Ahi hosi Dili aprezenta produtu tradisionál ne’ebé sira tein uza talas, fehuk kahur ho trigu hodi transfoma sai dosi talas-lulun, paun falun no seluk tan.

Kompetisaun tein ai-han lokál hetan akompañamentu juri hosi Ministériu Agrikultura no Peska (MAP), Ministériu Saúde (MS), UN women, Programa Ai-han Mundiál (WFP, sigla inglés), Fundu Nasaun Unida ba Infánsia (UNICEF, sigla inglés) no seluk tan.

Nune’e, ekipa juri hasai de’it valór hosi rezultadu tein ai-han lokál ne’ebé ohin aprezenta hosi grupu juventude tolu no sei anunsia fulan-dezembru nia rohan.

Orsamentu ba prémiu suku, grupu feto, grupu to’os-na’in, grupu juventude no grupu suporta inan, mai hosi apoiu WFP ho montante $100.000.

Iha biban hanesan Reprezentante grupu kreativu HATAJO, Delfina da Silva, apresia no kontente bele partisipa kompetisaun tein ai-han lokál tanba liuhosi atividade ne’e mak sira bele fahe esperénsia.

“Ai-han ne’ebé ohin ami halo kombinasaun, iha nutrisaun barak ba saúde tanba mai hosi produtu lokál,” nia dehan.

Jornalista : Arminda Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here