Governu no parseiru dezenvolvimentu lansa programa prémiu nasionál nutrisaun, iha salaun city 8, Manleuana Has-laran, segunda (09/08). Imajen TATOLI/Egas Cristóvão

DILI, 09 agostu 2021 (TATOLI)—Koordenadór Gabinete Apoia Sosiedade Sivil (GASC, sigla portugés), Filipe da Costa, hateten, prémiu nasionál nutrisaun ne’ebé realiza atu rekoñese atividade kreativu no inovativu timor-oan sira.

“Hafoin lansamentu sei loke kedan oportunidade atu simu nomeasaun hosi grupu sira hanesan líder komunitáriu, grupu feto, grupu joven, grupu agrikultór, no sira ne’ebé grupu suporta inan hodi hadi’a situasaun má nuturisaun no inseguransa ai-han iha komunidade,” Koordenadór GASC informa iha salaun City 8, Has-laran, segunda ne’e.

Notísia relevante: Vensendór dahuluk programa nasionál nutrisaun sei hetan $5.000

Nune’e, nomeasaun hahú ohin no sei ramata iha loron 20 setembru 2021, ne’ebé durante períodu ne’e ekipa responsável eventu sei fahe informasaun kona-ba prosesu submete nomeasaun, kritériu, no seluk tan.

“Sé buat hotu la’o di’ak, ami sei organiza seremónia atribuisaun prémiu nutrisaun iha loron 16 outubru durante selebrasaun loron ai-han mundiál,” Filipe da Costa akresenta.

Prémiu nasionál nutrisaun ba tinan ne’e realiza hosi GASC ne’ebé tutela ba Gabinete Primeiru-Ministru.

Atividade ne’ebé partense iha prémiu nasionál nutrisaun maka atribuisaun prémiu ba mánan na’in, halo vizita interkámbiu entre sira ne’ebé la mánan ba mánan-na’in, no halo seminar kona-ba nutrisaun hodi fahe informasaun, esperiénsia no prátika di’ak sira.

“Ita hotu hatene katak maski Governu Timor-Leste no parseiru dezenvolvementu sira investe ona rekursu barak, péritu iha rai-laran no rai-li’ur mai hatudu ona dalan oioin, no hosi intervensaun barak konsege halo ona progresu balun iha tinan hirak liubá, maibé problema má nutrisaun kontinua a’as iha Timor-Leste. Má nutrisaun sai nafatin dezafiu boot ba ita-nia dezenvolvementu nasionál, kualidade edukasaun, kreximentu ekonomia, no seluk tan,” nia hatutan.

Maski nune’e, tuir Koordenadór GASC, Estadu iha kompromisu maka’as atu halakon problema má nutrisaun no inseguransa ai-han iha Timor-Leste.

“Kuaze orgaun Estadu hotu, hahú hosi Presidente Repúblika, Parlamentu Nasionál, no Governu halo ona asaun barak hodi kontribui hadi’a nutrisaun iha Timor-Leste. Foin lalais ita finaliza tan planu asaun multi setorál ida atu halakon kestaun hirak ne’e iha ita-nia rai,” nia subliña.

Timor Leste adere ona ba Scaling Up Nutrition  (SUN) Movement, Food System Summit, Coalition for Education no seluk tan, ne’ebé Organizasaun Nasaun Unida (ONU) lansa hanesan asaun ida hodi país membru sira adota, ne’ebé hatudu Timor-Leste nia kompromisu atu halakon má nutrisaun, tanba ne’e Governu presiza konsolida esforsu no rekursu atubele akansa lalais objetivu.

Sekretariadu SUN Movement nasionál iha GASC sei fasilita prosesu sira hahú hosi fahe informasaun, simu nomeasaun, halo selesaun no sei fasilita atribuisaun prémiu ba mánan-na’in.

Eventu ne’e Sekretariadu SUN Movement hetan apoiu fundu $100.000 husi Programa Ai-han Mundiál (WFP, sigla inglés) no hetan apoiu pesoál no ekipamentu serbisu hosi Department of Foreign Affairs and Trade (DFAT) no United Nations Children’s Emergency Fund (UNICEF).

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here