Osan Dolar Amérika. Imajen/Espesiál

DILI, 06 dezembru 2021 (TATOLI)—Governu foti orsamentu billiaun $1-resin hosi fundu mina-rai hodi finansia Orsamentu Jerál Estadu (OJE) 2022.

Notisia Relevante: Ohin, PN-Governu debate proposta lei OJE 2022 iha espesialidade   

Tuir tabella II-Reseita orgaun no servisu Administrasaun Sentrál ho nia deskrisaun hanesan transferénsia fundu petrolífeiru $1,042,472.536 kompostu hosi rendimentu sustentável estitimadu (RSE) ho montante $554,077,576 no transferénsia superiór RSE ho valór $488,394,960.

Reseita naun petrolífera $548,090.680, reseita tributária $132,506.811 kompostu hosi impostu direta $51.757.975, impostu indireta $69.801.709 no taxa $10.947.127.

Enkuantu, reseita propria $11,770.557, doasaun, heransa no legadu $15,639.298 kompostu hosi doasaun Uniaun Europeia $9,000.000, Austrália $6,639.298.

Rendimentu $6,663.014 kompostu hosi dividendu $2,941.616, juru $595.186 no renda $3,126.212.

Saldu jerénsia $330,711.000, empréstimu $50,800.000, ho totál $1,590,563.216 ba proposta Orsamentu Jerál Estadu (OJE) 2022.

Deputada CNRT, Maria Fernanda Lay, kestiona tabella II la prevee reseita hosi Rejiaum Administrativa Ezpesiál Oé-Cusse Ambeno (RAEOA) nian.

Deputadu PD, Adriano do Nacimento, hateten Timor-Leste iha bankdu Estadu ida mak Banku Nasionál Komérsiu Indústria (BNCTL). Maibé, nia nota tuir esperiénsia uluk katak iha instituisaun Estadu nian hanesan RAEOA, osan hosi OJE bainhira transfere ba rai fali iha banku privadu.

“Ha’u hanoin polítika ida la benefísia ita-nia an, osan Estadu nian rai fali iha banku estranjeiru. Nune’e, rekomenda ita-nia osan rai iha banku BNCTL hodi jere. Tan ne’e, Primeiru-Ministru hanoin instituisaun Estadu hotu kuandu hetan osan Estadu nian, labele tau fali iha banku privadu maibé di’akliu hamoris iha banku Timor nian,” Adriano do Nacimentu levanta iha ámbitu debate  proposta OJE 2022 iha faze espesialidade ba loron dahuluk, iha plenária Parlamentu Nasionál. segunda ne’e.

Ministru Finansa, Rui Augosto Gomes, hateten tabela II ne’e ko’alia kona-ba reseita administrasaun sentrál.

Reseita propria iha tabela II hosi institutu públiku ne’ebé kompleta iha ne’ebá no RAEOA sub-setór autónomu finanseiramente, tanba ne’e nia reseita labele aprezenta iha tabella II no tau iha tabela IV.

Nia dehan, Autoridade Nasionál Komunikasaun (ANC, sigla portugés) hetan alokasaun orsamentu ki’ik maibé rekolla reseita boot tanba ida-idak jere osan no sira-nia atividade komersiál boot.

Governante ne’e esplika, dalabarak ema hakarak atu tulun Banku iha Timor-Leste maibé banku sira la responde ba nesesidade ne’ebé eziste, tanba ne’e nafatin rekore ba banku privadu.

Banku hotu servisu sira-ne’ebé Timor-Leste presiza no BNCTL mós públiku hanesan empreza, nune’e labele privilejia de’it ida, tanba ne’e bele hamate konkorénsia saudavel.

Enkuantu, reprezentante povu sira halo votasaun ba proposta lei Orsamentu Jerál Estadu (OJE) 2022 previstu kapítulu II Orsamentu Jerál Estadu, artigu 5 (Aprovasaun), b) Tabela II anexu prezente lei, parte integrante, ho reseita orgaun no servisu administrasaun sentrál, ho rezultadu votasaun a-favór-38, kontra 0 no abstesaun 26.

“Nune’e, Tabele II proposta reseita orgaun servisu administrasaun sentrál aprovadu,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária iha Parlamentu Nasionál

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here