Profisionál ne’ebé APORTIL no empreza Dames hosi Olanda prepara fó formasaun hodi lori ró-ahi Berlin-Ramelau no Berlin Nakroma, iha salaun APORTIL, Colmera, segunda (06/12). Imajen TATOLI/António Gonçalves

DILI, 06 dezembru 2021 (TATOLI)–Autoridade Portuáriu Timor Leste, Institutu Públiku (APORTIL, I.P) hamutuk ho empreza Dames hosi Olanda, daudaun ne’e hahú prepara tripulante timor-oan na’in-14 durante semana tolu utiliza ró-ahi Berlin Nakroma no Berlin-Ramelau.

Prezidente Konsellu Administrasaun APORTIL, I.P, Flávio Cardoso Neves. Imajen TATOLI/António Gonçalves

Prezidente Konsellu Administrasaun APORTIL, I.P,  Flávio Cardoso Neves, hateten, treinamentu ne’e atu promove timor-oan-sira lori ró-ahi ho di’ak.

“Treinadór rua hosi empreza mai iha Timór hodi fó treinentu ba tripulante timor-oan, tanba planeia ona katak 90% ita sei jere ró-ahi Berlin-Ramelau,” Flávio Cardoso, informa, iha ninia knaar fatin, Portu Dili, segunda ne’e.

Notísia relevante: Laloran boot difikulta viajen ró-ahi Berlin-Ramelau hosi Xina-Dili

Formadór hosi Olanda fó formasaun ba tripulante timor-oan, iha salaun APORTIL, Colmera, segunda (06/12). Imajen TATOLI/António Gonçalves

Maski nune’e, APORTIL planeia halo rekrutamentu ba área espesiál sira hanesan kapitaun ró, mekániku no iha área eletrisidade.

“Treinadór sira ne’ebé mai, sei halo familiarizasaun ba ró Berlin-Ramelau, atu nune’e timor-oan sira sai tripulante, nune’e hatene loloos ró-nia situasaun no kondisaun,” nia akresenta.

Aleinde ne’e, durante semana tolu ne’e, treinadór sira sei akompaña tripulante timor-oan sira halo viajen ba Oé-cusse no Ataúro, nune’e bele domina didi’ak terrenu molok utiliza ró-ahi ne’ebé Governu prepara.

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here