Profesora sira akompaña hela estudante Eskola Ensinu Báziku Canossa iha sala aula, hafoin Governu hasai sirkular hodi reativa fali aula prezensiál ba eskola sira iha Dili laran, segunda (20/09/2021). Imajen TATOLI/António Gonçalves

DILI, 03 dezembru 2021 (TATOLI)—Relasiona ho implementasaun programa merenda eskolár tinan ne’e ba estudante 320.000 ne’ebé ezekuta ho di’ak, tanba ne’e Governu sentrál deside deskonsentra programa ne’e ba munisípiu sira.

Nune’e, kada munisípiu mak sei jere orsamentu ba programa ne’e, ne’ebé antes ne’e programa ne’e diretamente jere hosi MEJD sentrál

“Kolaborasaun ministériu rua ba programa merenda eskolár  efetivu hela, tanba ne’e MEJD halo ona deskonsentrasaun programa ne’e ba munisípiu 12 no MAE aloka ona orsamentu $15.000 ba munisípiu sira ne’e,” Ministru Administrasaun Estatál, Miguel Pereira de Carvalho, informa iha iha Parlamentu Nasionál (PN), iha sesta ne’e.

Ministru Miguel ko’alia asuntu ne’e tanba Deputadu hosi Komisaun G ne’ebé trata asuntu Edukasaun, Kultura, Juventude, Desportu no Sidadania, husu ministériu rua koordena ho di’ak no tau atensaun maka’as ba programa edukasaun ne’e.

“Nune’e, bele garante alunu sira iha tinan ne’e bele hetan atendimentu merenda eskolár ho lalais,” nia akresenta.

Notísia relevante: MEJD sei hapara provizóriu merenda eskolár iha munisípiu ualu

Orsamentu ba merenda eskolár bazeia ba númeru estudante ne’ebé iha, ne’e duni prevee millaun $7-resin ba estudante 281.418 hosi pre-eskolár no ensinu báziku.

“Loloos orsamentu ne’e tenke mantein millaun $15 hodi responde ba loron 191 merenda eskolár, maibé tanba limitasaun orsamentu, entaun munisípiu sira hamenus orsamentu merenda eskolár,” governante ne’e tenik.

Maski eskola balun iha Covalima, Lautém no Dili, iha tinan ne’e la hetan merenda eskolár, maibé eskola seluk kontinua programa ne’e ho di’ak

“Iha Dili tanba implementasaun konfinamentu obrigatóriu, entaun sira-nia ezekusaun orsamentu kiik hela, maibé iha munisípiu sira seluk di’ak. Tanba ne’e, Parlamentu Nasionál sujere tinan 2022 implementasaun programa merenda eskolár ba estudante ensinu báziku sira iha territóriu nasionál tenke efetivu, ne’e duni ministériu rua tenke iha liña koordenasaun di’ak,” nia dehan.

Jornalista : Tomé Amado

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here