Ministeriu Justisa liuhosi Terra no Propriedade hasai Grupu Arte Moris nia sasán iha eis edifísiu artekultura Comoro, kinta (02/12). Imajen TATOLI/António Gonçalves

DILI, 02 dezembru 2021 (TATOLI)–Eis Prezidente Repúblika, José Manuel Ramos Horta, deside oferese nia rezidénsia iha Metiaut temporáriu ba grupu Arte Moris bele rai obra arte sira ne’ebé durante ne’e halo, nune’e bele hein fatin definitiva ida.

“Ha’u pesoalmente oferese ha’u-nia uma iha Metiaut ba maluk Arte Moris, nune’e bele rai sasán ne’ebé sira iha, tanba ha’u triste bainhira obra sira-ne’ebé ita-nia joven halo tinan barak ona tenke hasai rai de’it iha areadór,” Ramos Horta hateten hafoin halo abertura ba fórum diálogu Dili kona-ba mídia konvensionál iha era dijitalizasaun, iha Delta Nova, kinta ne’e.

Notísia relevante: MJ deside fó “loron tolu” ba grupu Arte Moris hamamuk fatin  

Eis Prezidente Repúblika, José Manuel Ramos Horta, hasai foto ho joven sira ne’ebé halibur iha grupu Arte Moris, iha edifísiu Comoro, sesta (02/12). Imajen TATOLI/António Gonçalves

Tuir Horta, Governu iha kompeténsia deside hasai grupu Arte Moris hosi fatin ne’e, maibé tenke hanoin didi’ak no buka fatin seluk luan no dignu.

“Ha’u rona fatin ne’ebé Governu liuhosi Terra no Propriedade oferese laiha estrada tama, tanba ne’e sira kontinua halo diálogu atu hetan solusaun, maibé tanba seidauk iha mak haruka polísia hasai sasán arte sira. Governu la presiza halo nune’e, tanba bele halo Timor-Leste nia-naran sai a’at. Sasán ne’ebé daudaun hasai tau de’it iha areadór Arte Moris, haree hanesan rejime komunista, sunu livru no destroi arte sira, tanba ne’e Governu tenke hanoin didi’ak, nune’e joven sira kontinua nafatin kreatividade sira,” nia akresenta.

Eis Prezidente Repúblika, José Manuel Ramos Horta, dada-lia ho Prezidente Asosiasaun Arte Moris, Iliwatu Danabere, iha edifísiu Comoro, sesta (02/12). Imajen TATOLI/António Gonçalves

Iha sorin seluk, Prezidente Asosiasaun Arte Moris, Iliwatu Danabere, triste ho desizaun Governu, tanba sira tenke husik fatin ne’ebé sira hela kleur ona.

“Desizaun ne’ebé Governu fó, loron aban, sesta (03/12) tenke sai hosi Arte Moris ne’e tristeza boot, tanba ami seidauk iha fatin loloos atu uza,” nia dehan.

Maski nune’e, nia parte apresia ho inisiativa Horta ne’ebé bele ajuda iha situasaun difisil nia laran.

“Ha’u sente kontente ba Eis Prezidente Ramos Horta ne’ebé sempre iha ba ami tempu ne’ebé de’it, liuliu iha situasaun agora bainhira Governu mai hasai arte sira ne’ebé durante ne’e ami halo, tau de’it iha li’ur, horikalan ami simu ona informasaun katak provizóriu ami sei rai sasán iha señor Horta nia uma,” Iliwatu Danabere dehan.

Aleinde ne’e, iha ona fatin alternativa provizóriu hanesan Xanana Reading Room no Dioseze Dili iha Bidau, hodi grupu Arte Moris tau sasán.

Notísia relevante: Arte Moris rejeita armazen Bebora tanba la sufisiente hala’o atividade

Jornalista : Arminda Fonseca

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here