Reprezentante hosi terras no propriedade halo hela diskusaun ho Grupu Arte Moris, hodi esplika kona-ba desizaun no ezekusaun husi tribunal, kuarta 1/12/2021.Imajen Tatoli/Antonio Goncalves

DILI, 01 dezembru 2021 (TATOLI)— Ministériu Justisa (MJ) liuhosi Sekretaria Estadu Terras no Proriedade (SETP) aplika prosesu administrativa ho tempu loron tolu ikus hahú hosi ohin (01/12) to’o sesta (03/11), ba Grupu Arte Moris hamamuk ona fatin ne’ebé okupa.

Despeza Administrativa ne’e ho baze ba orden ka despaisu ho númeru 129/ GSEPT/2021 hosi Ministériu Justisa liuhosi SEPT.

“Ha’u hanoin prosesu ne’e la’o kle’ur tiha Governu ho parte Grupu Arte Moris no Governu hatudu ona fatin própriu ba ita nia nia maluk sira no ohin hanesan loron ikus sira tenke hamamuk fatin ne’e,” Reprezentante ekipa Diresaun Despeza Administrativa SEPT, João Reis Sarmento da Cruz, hateten ba Agência Tatoli iha Arte Moris Comoro, kinta ne’e.

Notísia Relevante: Governu Deside Ona Fatin Própriu ba Grupu Arte Moris

Reprezentante hosi teras no propriedade hala’o hela diskusaun ho Grupu Arte Moris, hodi esplika konaba desizaun no ezekusaun husi tribunal, kuarta 1/12/2021.Imajen Tatoli/Antonio Goncalves

Tanba, Governu liuhosi SEPT antes ne’e fó ana prazu loron 30 no tuir fali loron 10 atu grupu Arte Moris mobiliza sasán sira hodi abandona fatin ne’e.

“Maibé, realidade laiha no ohin ami ezekuta orden ka despaisu despeza administrativu hosi Ministériu Justisa hatun ba SEPT atu haruka sira hamamuk fatin ne’e durante loron tolu nia laran hahú ohin (01/12) to’o sesta (03/11),” nia fó hanoin.

Nune’e, nia husu ba grupu Arte Moris atu koopera no kumpre desizaun Estadu hodi husik fatin ne’e otomatimente.

“Kuandu sira (grupu Arte Moris) koopera ho boa fé, ami la presiza lori polísia  mai sira rasik maka  sai ho vontade,” nia sujere.

Iha biban hanesan, Diretór Grupu Arte Moris, Iliwato Dana Bere, hateten, nuudar sidadaun kualkér desizaun hosi Estadu nian ba dezemvolvimentu prontu kolabora.

Portavoz Grupu Arte Moris. Imajen Tatoli/Antonio Goncalves

“Ami kolobora  atu muda, maibé atu husik fatin ne’e uluk kedan ami hato’o tiha problema ne’e ba Governu katak presiza Governu hatudu fatin digñu atu kontinua ami nia  obra sira ne’e,” nia akresenta.

Grupu Arte Moris sente hakfodak bainhira sira nia ezijensia sei iha hela prosesu negosiasaun ho Governu, maibé derepente mai hakarak hasai obrigatóriu.

Tanba, Grupu Arte Moris la simu fatin ne’ebé Governu hatudu hanesan iha Ministériu Turizmu, Komérsiu no Indústria nia kotuk tanba la merese atu kontinua obra ka atividade.

“Governu hatudu fatin armazein Bebora nian ne’e, ami rejeita tanba fatin la dignu no labele akumula ami nia sasán. Ami mós hato’o pedidu fatin ne’ebé ami indika rasik, maibé Ministériu Justisa indefere ami nian proposta tanba dehan rai ne’e Estadu nia,” Portavóz ne’e lamenta.

Entretantu, ba prosesu ezekusaun despeza administrativa hasoru Grupu Arte Moris, hamosu dezentendimentu durante oras rua, maibé to’o ikus Grupu Arte Moris rasik konvensidu no   konkorda malu hodi tula sai sasán ba fatin ne’ebé Governu indika ho tempu ka loron tolu nia laran.

Komunidade prontu hamamuk fatin

Entretantu, Portavóz abitante akupante areadór Arte Moris, Roberto Gusmao, hateten, hela iha rai Arte Moris ninian ne’e kuaze tinan 14-resin ona, ne’ebé daudaun prontu koopera ho Estadu atu hamamuk fatin.

Portavoz abitante akupante areador Arte Moris, Roberto Gusmão,.Imajen Tatoli/Antonio Goncalves

“Ami sira hela iha ne’e uma-kain 14 ho totál família nain-200-resin, maibé ami ho Governu  iha kooperasaun di’ak. Ami prontu atu hamamuk fatin ida ne’e tuir regulamentu ne’ebé regula iha ita nia nasaun,” nia akresenta.

Portavóz ne’e mós agradese ba Governu tanba fó ona fatin ne’e hodi sira hela iha tinan barak nia laran.

Alende ne’e, abitante afetadu hirak ne’e mós hetan ona indemizasaun hosi parte Kosellu Kombatente Libertasaun Nasionál (CCLN sigla portugés).

“Ami atu ba ne’ebé ne’e idak-idak nian konsénsia tanba ami hetan ona indemnizasaun hosi Govenu ho kada uma kain ida hetan $2.000”, Nia realsa.

Notísia Relevante: Arte Moris Prontu Koopera ho Governu Entrega Edifísiu ba CCLN, Maski Hasoru Difikuldade

Jornalista  : Natalino Costa

Editór        : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here