Komunidade hamoos baleta tuir programa Mão de Obra. Imajen Tatoli/Celestina Teles

COVALIMA, 02 dezembru 2021—Reprezentante administradór munisípiu Covalima, Afonso Nogueira Nahak informa, implementasaun programa mão de obra ba primeiru no segundu faze iha postu administrativu hitu (7) iha Covalima finaliza ona.

Notísia Relevante: Implementasaun programa mão de obra iha Covalima besik finaliza ona

Reprezentante administradór munisípiu Covalima, Afonso Nogueira Nahak. Imajen Tatoli/Celestina Teles.

“Implementasaun programa mão de obra iha primeiru no segunda faze iha Covalima finaliza hotu ona. Agora, administradór postu administrativu sira hein atu entrega de’it relatóriu ba administrasaun munisípiu Covalima,” Afonso Nogueira Nahak hateten ba Agência Tatoli, iha salaun Família Resto, kinta ne’e. 

Durante implementasaun programa mão de obra, administradór sira implementa bazea ba planu no programa ne’ebè mak aprezenta no hetan aprovasaun hosi administradór munisípiu Covalima.

Implementa programa mão de obra iha Covalima, ne’ebé hala’o iha postu administrativu sira foku liu ba hamoos baleta, ateru estrada, halo jardin iha resintu edifisiu no harii lutu haleu postu administrativu sira. 

“Bazea ba ha’u-nia monitorizasaun, programa mão de obra pozitivu tebes. Ita hein Governu kontinua aprova osan ba programa refere, maibe hadi’a estrada mak lori mudansa iha Covalima,” nia dehan. 

Administradór postu administrativu Maucatar, Sebastião Guterres, dehan implementasaun programa mão de obra iha postu administrativu Maucatar finaliza ona no hein atu entrega relatóriu.

“Implementasaun programa mão de obra finaliza ona no hosi postu administrativu mós halo ona monitorizasaun. Ami-nia relatóriu ba primeira faze, ami submete hotu ona no hein ba segunda faze nian,” nia esplika. 

Enkuantu, implementasaun programa mão de obra iha faze dahuluk ramata ona, ne’ebé foku liubá hadi’a estrada, hamoos baleta, kuda ai-funan no mós harii jardín iha edifísiu postu  administrativu sira-ne’ebé orsamentu mai hosi orsamentu jerál Estadu 2021, no aloka ba kada postu administrativu montante $50,000.00 no hosi orsamentu ne’e foti $25,000.00.

Jornalista : Celestina Teles

Editór       : Cancio Ximenes 

PUBLISIDADEiklan

HAKEREK NO HATÁN

Please enter your comment!
Please enter your name here