Obra husi grupu Arte Moris iha edifísiu Comoro. Imajen/memim.com

DILI, 07 jullu 2010 (TATOLI) – Iha enkontru Prezidente Administrasaun Konsellu Kombatente Libertasaun Nasionál (CCLN, sigla portugés), Vidal de Jesus ‘Riak Leman’ iha segunda ne’e, ko’alia kona-ba edifísiu ba konsellu no biban ne’e Xefe Governu deside ona atu fó Arte Moris Comoro hodi hala’o servisu.

Tanba ne’e, Arte Moris ne’ebé kompostu husi joven timor-oan ne’ebé durante ne’e espresa sira nia talentu liuhosi arte, prontu koopera ho Governu maibé husu atu prepara hikas fatin seluk ba sira tanba daudaun iha obra arte barak maka tau iha edifísiu ne’e.

Diretór Arte Moris, Iliwatu Danabere, hateten bainhira laiha fatin hodi sira tau produtu ne’ebé sira iha maka sasán hirak ne’e sei abandonadu.

“Firme no prontu koopera la ho dúvida, maski difikuldade mak boot loos ba ami maibé espera iha diálogu ka solusaun ruma hosi Governu,” tenik Jerente ne’e ba Agência Tatoli via telefónika, tersa ne’e.

Notísia Relevante: PM Taur Deside CCLN Okupa Edifísiu Arte Moris Comoro

Tuir responsável ne’e, PM Taur pronúnsia ona katak CCLN atu muda ba edifísiu Comoro, maibé to’o agora parte Arte Moris seidauk hatene atu muda ba ne’ebé.

“Ne’e mak ami la hatene tamba ami maioria mai husi foho no laiha fatin sufisiente atu rai obra sira ne’e,” nia karesenta.

Diretór dehan, nia parte inklui maluk sira iha Arte Moris senti hakfodak tebes bainhira akompaña informasaun liuhosi meiu komunikasaun sosiál sira.

“Ami hotu hakfodak ho notísia tamba seidauk iha informasaun ruma antes, ami nota Avo veteranu sira mai iha ami nia kompaun maibé ami la hetan notifikasaun ruma antes no depois. To’o ohin loron seidauk iha entidade ruma husi parte Governu maka mai hasoru ami,” Iliwatu subliña.

Nia haktuir, iha loron 23 juñu tinan ne’e ekipa CCLN ba duni haree fatin ne’e maibé la ko’alia ho ekipa Arte Moris.

“Dadaun ne’e ami iha obra arte nakonu iha kampaun tolu ne’ebé mak ami uza no ami-nia atividade aprendijazen sira sei paradu hotu inklui iha mós grupu tolu mak iha fatin ne’e hamutuk ho ami ne’ebé sei sai abandonadu mós,” Diretór ne’e realsa.

Ba asuntu ne’e, tempu badak ekipa Arte Moris sei hasoru Sekretaria Estadu Arte no Kultura (SEAK) no husu Sekretaria Estadu Komunikasaun Sosiál (SEKOMS) atu sai medidadór hodi buka solusaun ba sira nia preokupasaun.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here