Seremónia lansamentu hatuur ai-riin eletrisidade iha suku Tutuluro, tersa (30/11). Imajen TATOLI/Francisco Sony

MANUFAHI, 30 novembru 2021 (TATOLI)–Ministru Obra Públika (MOP), Salvador Eugênio Soares dos Reis Pires, no Prezidente Konsellu Administrasaun Eletricidade de Timor-Leste, Empreza Públiku (EDTL, E.P), Paulo da Silva, tersa ne’e, hatuur ai-riin liña eletresidade iha suku Tutuluro, postu administrativu Same, munisípiu Manufahi.

Ministru Obras Públika, Salvador Eugênio Soares dos Reis Pires. Imajen TATOLI/Francisco Sony

Ministru Obras Públika, Salvador Eugênio Soares dos Reis Pires, hateten, inisiativa ne’e tama iha programa, tanba nu’udar esforsu Governu fornese infrestrutura bázika ba komunidade atubele fasilita dezenvolvimentu sosiu ekonómiku, nune’e bele halo negósiu, estudante bele estuda ho dia’k iha tempu kalan no seluk tan.

“Governu kira ambiente ba dezenvolvimentu infresturura bázika atubele eleva povu moris di’ak, liuhosi planu asaun sira ne’ebé agora daudaun ita halo hanesan lansamentu liña eletrisidade,” Ministru relata iha ámbitu lansamentu hatuur ai-riin liña eletrisidade iha suku Tutuluro, tersa ne’e.

Notísia relevante:Uma-kain 530 iha suku Tutuluro seidauk asesu eletrisidade 

Kona-ba eletrisidade, Governu Timor-Leste kompromete atinje Objetivu Dezenvolvimentu Sustentavél (ODS) númeru hitu ne’ebé mensiona kona-ba asesu ba liña eletrisidade.

“Foin lalais ha’u halo relatóriu ba Asembleia Jerál Organizasaun Nasaun Unida (ONU), katak ita kompremete iha tinan 2023 Timor-Leste bele asesu ona eletrisidade besik 100%, ne’ebé agora komunidade ne’ebé asesu ona ba liña eletrisidade 89%, hanesan kompromisu ida,” nia akresenta.

Seremónia lansamentu hatuur ai-riin eletrisidade iha suku Tutuluro, tersa (30/11). Imajen TATOLI/Francisco Sony

Nune’e, governante ne’e husu ba komunidade lokál atu kontribui no tau-matan nafatin ba empreza ne’ebé halo serbisu, nune’e bele serbisu ho kualidade.

Liña eletrisidade ne’ebé lansa ho ninia medida kilómetru 5,3 ba media tensaun, sub-tensaun kilómetru 6,7, ne’ebé sei benefisia ba kliente uma-ka’in 250  iha aldeia tolu iha suku Tutuluro hanesan Roin, Sosemera, no Dala, enkuantu aldeia haat seluk hanesan Batas, Hastete, Ailau no Bubolau seidauk tanba ekipa sei halo lai levantamentu dadus. 

PrezidenteKonsellu Administrasaun EDTL, E.P, Paulo da Silva. Imajen TATOLI/Francisco Sony

Iha fatin hanesan, Prezidente Konsellu Administrasaun EDTL, E.P, Paulo da Silva hateten, aldeia haat ne’ebé seidauk, nia parte orienta ona tékniku sira atu halo levantamentu dadus urjente hodi bele aselera iha faze sira tuir mai.

“Ha’u husu autoridade lokál no komunidade atubele kontrola empreza nia serbisu atubele garante kualidade, tanba EDTL hanesan empreza públika, ita tenke garante kualidade,” nia dehan.

Líder komunitáriu sente milagre boot bele hetan naroman

Xefe Suku Tutuluru, Sebastião da Costa Hornai. Imajen TATOLI/Francisco Sony

Nune’e mós, Xefe suku Tutuluro, Sebastião da Costa Hornai, agradese tanba komunidade iha suku ne’e bele ona hetan milagre boot, tanba tinan barak komunidade seidauk sente valór hosi ukun-an tanba laiha liña eletrisidade.

“Ami senti ukun-an ne’e iha villa de’it,  tanba ami iha foho ne’e la sente ahi nia naroman, maibé ohin ita tama ona iha lista ida ukun-an nian, tanba halo ona lansamentu ai-riin dahuluk liña eletrisidade iha suku ne’e,” nia apresia.

Abitante suku Tutuluro, Jaquim da Silva, agradese ba VIII Governu no sente orgullu tanba tinan barak sira-nia mehi ba eletrisidade foin realiza.

Diretór empreza Damenia Unipesoal Lda, Cidalio Reis. Imajen TATOLI/Francisco Sony

Diretór empreza Damenia Unipesoal Lda, Cidalio Reis, ne’ebé responsável ba projetu eletrisidade ne’e dehan, orsamentu ba projetu ne’e hamutuk $297.686,48, ho durasaun implementasaun fulan-haat.

“Ita koko finaliza tuir tempu, maibé haree ba prosesu liga ho komunidade sira-nia ai-horis, karik iha implementasaun maka kona, bainhira sira koopera mak ita bele aselera lalais. Aleinde ne’e, liga ho situasaun udan bele prejudika serbisu iha terrenu,” nia akresenta.

Suku Tutuluro rasik iha aldeia hitu hanesan Roin, Sosemera, Dala, Batas, Hastete, Ailau no Buboluan, ho totál abitante 2.000-resin hosi uma-kain 500.

Notísia relevante: EDTL, E.P deside re-anunsia konkursu instala eletrisidade pakote 30

Antes ne’e, EDTL, E.P loke konkursu eletrifikasaun nasionál hamutuk pakote 30 iha suku 33, hosi totál suku 76 iha territóriu nasionál ne’ebé seidauk asesu ba eletrisidade.

Empreza nasionál kuaze hamutuk 167 konsege sosa dokumentu konkursu públiku ne’ebé EDTL,E.P lansa iha faze dahuluk projetu ne’e.

Orsamentu ba projetu eletrifikasaun iha suku 76 ne’ebé seidauk asesu eletrisidade hamutuk millaun $12, ne’ebé prevee ona iha orsamentu tinan 2021.

Jonalista : Francisco Sony

Editora    : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here