Xefe suku Tutuluro, Sebastião da Costa Hornai. Imajen TATOLI/Natalino Costa

MANUFAHI, 29 jullu 2021 (TATOLI)—Xefe suku Tutuluro, postu administrativu Same, munisípiu Manufahi, Sebastião da Costa Hornai, hateten, maioria uma-kain iha suku Tutuluro seidauk asesu liña eletrisidade.

“Iha suku Tutuluro maioria uma-kain seidauk asesu eletrisidade, ne’ebé totál uma-kain iha suku ne’e hamutuk 530 mak seidauk asesu ba ahi, ho totál populasaun 2.530. Daudaun ne’e sira uza de’it lampu, lilin no tenaga surya, ne’ebé Xina sira fa’an iha merkadu, maibé sira ne’ebé iha kbiit mak bele sosa tenaga surya, maibé ba sira ne’ebé laiha uza de’it lampu no lilin,” Autoridade lokál informa iha ninia rezidénsia, iha suku Tutuluro, kinta ne’e.

Aleinde ne’e, populasaun iha suku ne’e iha problema asesu estrada, bee-moos no ponte.

“Bainhira udan mai, ami hasoru difikuldade boot tanba ponte a’at no transporte labele liu, inklui postu Alas, Turiskai, no Fatuberliu, liu dalan ne’ebé ponte a’at. Ami bá-mai merkadu lori produtu lokál la’o ain de’it,” nia akresenta.

Tuir líder komunitáriu ne’e, hanesan autoridade lokál iha suku ne’e, nafatin esforsu halo proposta to’o nível nasionál.

“Ami bolu kompañia balun mai maibé ikus mai, kompañia mós dada filafali ekipamentu tanba dehan laiha kontratu, ne’ebé iha suku ida ne’e difikuldade tebes ba estrada,” nia hatutan.

Aleinde ne’e, suku Tutuluro iha produtu sira hanesan kafé, batar, aifarina, fehuk, maek, no aiteka, tanba ne’e presiza hadi’a infraestrutura bázika sira hodi produtu hirak ne’e bele to’o iha merkadu.

“Kooperativa Kafé Timor mai sosa kafé direta hosi komunidade. Ami hanesan autoridade husu Governu halo esforsu no tau atensaun ba ami-nia problema,” nia tenik.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here