Logotipu FDCH. Imajen/Espesiál

DILI, 30 novembru 2021 (TATOLI)—Fundu Dezenvolvimentu Kapitál Humanu (FDCH) durante tinan-sia nia laran, hahú 2011 to’o 2020, fó ona bolsa estudu ba timor-oan hamutuk 6.401 hodi ba eskola iha rai-li’ur.

“Hosi totál benefisiáriu, na’in-4.184 finaliza ona estudu, na’in-hitu mate,  na’in-269 nia kontratu kansela no falta de’it bolseiru 1.941 mak ativu,” Diretór Ezekutivu FDCH, Hermenegildo da Silva, informa ba Agência TATOLI, iha ninia knaar fatin, Palásiu Governu,  tersa ne’e.

Enkuantu estudante sira ne’ebé gradua ona, 3.328 hetan ona serbisu no 826 seluk seidauk.

“Ita iha programa ida hanaran estájiu profisionál, ne’ebé daudaun iha ona bolseiru na’in-142 mak FDCH haruka ona ba ministériu sira hodi halo estájiu durante fulan-neen to’o tinan-ida, ne’ebé sira sei hetan mós osan transporte,” nia akresenta.

Notísia relevante: OJE 2022, FDCH prevee millaun $12 finansia programa haat

Aleinde ne’e, estudante na’in-684 to’o agora laiha informasaun kona-ba sira-nia paradeiru.

“FDCH iha programa ida hanaran buka tuir benefisiáriu, ne’ebé daudaun fundu realiza hodi buka tuir benefisiáriu sira. Karik funsionáriu públiku, tenke aprezenta-an ba ministériu ne’ebé haruka sira ba eskola, maibé ida-ne’ebé la’ós funsionáriu tenke mai aprezenta-an ba ami atu kumpre obrigasaun tuir kontratu ne’ebé halo ona, katak bainhira eskola ramata tenke mai serbisu iha Timór durante tinan ne’ebé termina, hafoin bele halo fali atividade seluk,” nia dehan.

Bolseiru na’in-269 ne’ebé FDCH halo kansela hosi instituisaun Estadu hanesan Ministériu Ensinu Superiór, Siénsia no Kultura (MESSK), Ministériu Finansa (MF), Ministériu Saúde (MS), Ministériu Soslidaridade Sosiál ni Inkluzaun (MSSI), Ministériu Agrikultura no Peska (MAP) no Universidade Nasional Timor-Lorosa’e (UNTL).

“Kansela benefisiáriu 269 ho razaun sira la konsege kumpre kontratu ne’ebé termina ona, balun tinan kontratu liu maibé la finaliza estudu no balun valór la to’o, tanba ne’e deside labele kontinua apoiu bolsa estudu. Kada tinan kuandu atu halo pagamentu, ita tenke haree lai valór estudante, karik valór la tuir kontratu ne’ebé iha mak tenke kansela,” Hermenegildo dehan.

Tuir Diretór Ezekutivu, kanselamentu bolseiru sira ne’e tanba konsidera problema sériu no investe ona osan maibé la konsege finaliza estudu.

“Tanba ne’e kada ministériu selebra kontratu ho bolseiru, ne’ebé tenke haree didi’ak asuntu ne’e ho sériu, atu nune’e Ministériu bele foti medida bazeia ba kontratu ne’ebé selebra ona. Karik iha kontratu ne’e mak hateten bolseiru ida la konsege finaliza ninia estudu iha tinan ne’ebé termina ona, tenke devolve fali osan Estadu ka tenke prosesa tuir lei ne’ebé vigora, entaun ministériu tenke halo ba ninia funsionáriu ne’e tanba osan sira povu nia,” nia dehan.

Durante tinan 2016 to’o 2020, FDCH aloka ona orsamentu $60.224.057 ba bolsa estudu 4.312 durante tinan-tolu, ne’ebé la’ós abranje de’it ba funsionáriu públiku sira maibé públiku ein jerál, ne’ebé hosi totál ne’e, bolseiru 1.978 mak finaliza ona estudu no fila ona mai Timor-Leste no total 2.334 maka kontinua hela estudu.

Jornalista : Tomé Amado

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here