Estudante Sekundáriu 04 Setembru UNAMET. Imajen TATOLI/António Gonçalves

DILI, 09 novembru 2021 (TATOLI)–Ministériu Edukasaun Juventude no Desportu (MEJD) hahú ona halo abertura ba prosesu impresaun pontu ezame nasionál iha sentru imprime Comoro.

Impresaun pontu ezame nasionál ba estudante finalista hamutuk 58.224 sei iha iha hahú tersa (10/11) no sei ramata iha loron 10 dezembru 2021.

Koordenadór Unidade Kurríkulu Nasionál, Pedro Ribeiro Gonçalves, informa, hosi totál estudante finalista iha eskola territóriu nasionál ne’e, kompostu hosi estudante ensinu báziku hamutuk 31.143, ensinu sekundáriu jerál 22.223 no ensinu sekundáriu tékniku vokasionál 4.858.

“Atu avalia alunu finalista no tinan ensinu báziku terseiru siklu no alunu désimu segundu ensinu sekundáriu nian, maka Gabinete Avaliasaun Dezenvolvimentu Kurikulár halo elaborasaun pontu hahú hosi loron 05 to’o 14 de outubru 2021, ne’ebé prosesu kompilasaun hahú husi loron 15 to’o 30 outubru 2021 no revizaun hahú hosi 19 outubru to’o 03 novembru 2021,” Koordenadór hateten iha seremónia abertura imprisaun iha sentru impresaun Comoro, tersa ne’e.

Ema na’in-70 mak halo imprisaun, ho kondisaun sei asegura konfidensialidade dokumentu sira ne’e to’o ramata.

“Ekipa ne’ebé envolve iha prosesu, antes ne’e asina ona termu konfidensialidade atu asegura dokumentu tomak relasionadu ho ezame nasionál,” nia akresenta.

Impresaun dokumentu ezame nasionál ne’e envolve Gabinete Avaliasaun Dezenvolvimentu Kurikulár hosi Gabinete Ministru Edukasaun, Juventude no Desportu, Gabinete Vise-Ministru, diresaun impresaun no diresaun relevante seluk.

Entretantu, prosesu impresaun ne’e rasik hetan apoiu seguransa hosi Polísia Nasionál Timor Leste (PNTL) atu fó seguransa di’ak hodi apoiu ekipa téknika nia serbisu labele hetan ameasa no bele mós evita problema seluk ne’ebé ema la hakarak.

Jornalista : Tomé Amado

Edtotora   : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here